Vindur á niður­leið en næsta lægð nálgast úr suð­vestri

Á vef Veðurstofunnar segir að það sé heldur að kólna og stefni í vægt frost eftir hádegið.

„Í kvöld og nótt nálgast næsta lægð úr suðvestri. Hún veldur suðaustanátt á morgun, stinningskaldi eða allhvass vindur. Úrkomusvæði lægðarinnar fer yfir og því má víða um land búast við ringingu eða slyddu. Útlit er fyrir talsverða rigningu sunnan- og vestanlands um tíma eftir hádegi og þá hefur hlýnað vel yfir frostmark um mestallt land,“ segir á vef Veðurstofunnar.

Veðurhorfur á landinu næstu daga

Á miðvikudag: Suðaustan 10-18 m/s og talsverð rigning eða slydda, en úrkomuminna á Norðausturlandi. Hlýnar í veðri, hiti 2 til 9 stig síðdegis.

Á fimmtudag: Sunnan og suðvestan 8-15 og slydduél, en bjartviðri norðaustantil. Hiti 0 til 5 stig. Snýst í norðanátt með snjókomu norðvestanlands um kvöldið og kólnar.

Á föstudag: Norðvestanátt og snjókoma eða él um landið norðanvert. Bjartviðri sunnanlands og síðar einnig vestantil á landinu. Frost 0 til 8 stig.

Á laugardag: Sunnanátt með slyddu og síðar rigningu, hlýnar um tíma. Vestlægari og skúrir eða él vestantil um kvöldið.

Á sunnudag: Suðvestanátt og él, en þurrt austanlands. Hiti um og undir frostmarki.

Á mánudag: Breytileg og síðar norðlæg átt og víða él, en léttir til á sunnanverðu landinu. Herðir á frosti.