Verð­launuð fyrir að berjast gegn slúðri

Í tilkynningu frá Heimili og skóla segir að Freyja Rós Haraldsdóttir hafi verið í forystu við Menntaskólann á Laugavatni í að móta og gefa út áætlun um aðgerðir gegn einelti, kynferðislegri áreitni, kynbundinni áreitni og ofbeldi – Ekko mál.

Freyja Rós hafi jafnframt haft frumkvæði að því að skipuleggja EKKO málaflokkinn með gæðakerfisskipulagi og þannig lagt grunn að aukinn fagmennsku.

„Það sem vakti sérstaklega athygli fagráðs er vinnan sem hún hefur unnið á degi gegn einelti en þá hefur hún haldið utan um metnaðarfulla dagskrá og má þar t.d. nefna dagskrá sem nefnist slúður er klúður og var tilgangur þeirrar málstofu að styðja við góðann skólaanda sem byggði á trausti og góðum samskiptum þar sem baktal og slúður geti verið særandi og haft slæm áhrif á allt og alla,“ segir í tilkynningunni.

„Jafnframt var rætt hvernig hægt er að standa saman svo að einelti, ofbeldi og áreitni eigi sér ekki stað. Að auki var umræða um nafnlausa aðganga og ljótar skilaboðasendingar. Þarna er unnið með þá ljótu menningu sem getur skapast á samfélagsmiðlum.“ 

Í október hafi vinnustofa verið haldin fyrir starfsfólk skólans um áhorfendamiðaða nálgun í ofbeldisforvörnum og sé það nú orðinn hluti af EKKO stefnu ML.

„Þessi vinna með Freyju Rós í fararbroddi sýnir hversu alvarlega ML tekur vinnu varðandi einelti og aðrar forvarnir nememdum skólans til heilla.“