Ekki lægri meðal­hiti frá árinu 1997

Meðalhiti síðustu tólf mánaða er frekar lágur og nær því sem hann var fyrir aldamót að sögn Einars Sveinbjörnssonar veðurfræðings en hann fór yfir veðrið á árinu, síðustu daga og fram undan í Bítinu á Bylgjunni. Nánar hér á vef hans Blika.is. 

Hiti síðustu daga sé góður til að hífa upp meðaltalið en ekki óvenjulegur á þessum árstíma. Um 10 stiga hiti er í Reykjavík í dag og fór hiti upp í 15 stig á einhverjum veðurstöðvum fyrir norðan í nótt.

Einar segir að miðað við tíðarfar síðustu 20 ár skeri þetta ár í augu. Það verði samt að hafa í huga að sveiflur í íslensku verðri séu algengar.

Hann segir síðustu mánuði hafa veið tíðar norðanáttir og meiri útbreiðsla pólsjó fyrir norðan. Sjávarhiti hafi beint áhrif á lofthita.

„Við vorum kannski að horfa á það fyrir nokkrum vikum að loftið væri upprunnið frá Austur-Grænlandi en nú er það upprunnið frá Marokkó,“ segir Einar. Loftið ferðist yfir Portúgal og svo yfir Atlantshafið.

Hlýtt veður viðvarandi

Einar segir að miðað við langtímaspá sé útlit fyrir áframhaldandi hæðarsvæði yfir Bretlandseyjum. Þessi hæð beini lofti til okkar úr suðri og í spám megi sjá að þetta verði viðvarandi fram á miðjan mánuð. Það verði ekki endilega svona heitt allan tímann en ólíklegt sé til dæmis að það fari að snjóa mikið.

Hann segir að síðustu daga hafi svo verið miklar umræður meðal veðurfræðinga að um miðjan mánuð skapist aðstæður til að snúa þessu við. Það hrökkvi aftur í norðanátt. Það sé erfitt að spá svo langt en það verði áhugavert að fylgjast með þróuninni.

Einar segir að þegar hann byrjaði fyrir 20 til 30 árum hafi menn ekki þorað að spá lengra fram en tvo til þrjá daga. Frá þeim tíma hafi orðið alger bylting í veðurspám.

„Við erum komin ansi langt með að ná þokkalegri nákvæmni að jafnaði fyrir svona fimm til sjö daga spár,“ segir Einar en að hann leiki sér oft að því að spá lengra fram í tímann. Stundum sé mikil spágeta en aðra mikill óróleiki og óvissa.

„Þegar hækkandi eða lækkandi sól er að umbreyta öllum veðurkerfunum,“ segir Einar og að þá sé erfiðast að spá til lengri tíma.

Þriðjungslíkur á vondu veðri á kjördag

Hvað varðar veður á kjördag í lok mánaðarins segir Einar að það séu þriðjungslíkur á því að ekkert verði að veðrinu en að veðrið hafi oft, síðustu 20 ára, verið slæmt á þessum degi eða dagana í kring.

Einar ræddi einnig veðurofsa og þurrka erlendis. Sem dæmi hafi verið þurrkar í Suður-Ameríku lengi sem séu tengdir við loftslagsbreytingar. Það hafi áhrif á framboð raforku og Amazon-skóginn sjálfan.

Rigningarnar á Spáni hafi verið skelfilegar og komið mönnum í opna skjöldu. Margir hafi ekki getað flúið veðrið en um 200 fórust í hamfaraflóðum í Valencia á Spáni í síðustu viku.