Fimm­tán stiga frost á Gríms­stöðum á Fjöllum í nótt

Á vef Veðurstofunnar segir að útlit sé fyrir nokkuð rólegt veður og að það verði kalt í dag. Er spáð hita í kringum frostmark yfir hádaginn.

„Í kvöld nálgast smálægð sunnanvert landið og undir miðnætti verður kominn austan strekkingur eða jafnvel allhvass vindur með suðurströndinni með snjókomu eða slyddu. Á morgun gera spár ráð fyrir að megin þunginn í úrkomusvæði þessarar lægðar fari framhjá landinu. Því má gera ráð fyrir hægum vindi á morgun með bjartviðri um landið norðan- og vestanvert og hita kringum frostmark. Lítilsháttar rigning eða slydda sunnan- og austanlands með hita 1 til 6 stig.

Á sunnudag er síðan útlit fyrir breytingar í veðurlagi. Þá gengur í ákveðna sunnanátt með rigningu og súld, en lengst af úrkomulítið á norðaustanverðu landinu. Það hlýnar í veðri og hiti seinnipartinn á sunnudag á bilinu 6 til 12 stig, hlýjast í hnjúkaþey fyrir norðan. Þessi sunnanátt á síðan að standa áfram á mánudag og þriðjudag með litlum breytingum,“ segir í hugleiðingum veðurfræðings.

Veðurhorfur á landinu næstu daga

Á laugardag: Austlæg eða breytileg átt 3-8 m/s. Bjartviðri um landið norðan- og vestanvert, hiti kringum frostmark. Lítilsháttar rigning eða slydda sunnan- og austanlands með hita 1 til 6 stig.

Á sunnudag, mánudag og þriðjudag: Ákveðin sunnanátt með rigningu eða súld, en úrkomulítið um landið norðaustanvert. Hiti yfirleitt á bilinu 6 til 12 stig.

Á miðvikudag: Stíf suðvestanátt með skúrum eða slydduéljum, en léttskýjað norðaustan- og austanlands. Hiti 2 til 8 stig, hlýjast á Austurlandi.

Á fimmtudag: Breytileg vindátt, rigning eða slydda í flestum landshlutum og hiti 1 til 5 stig.