Treystir Bjarna betur en öðrum for­ystu­mönnum

Þetta segir Guðlaugur Þór Þórðarson, umhverfis-, orku- og loftlagsráðherra, inntur eftir því hvort eðlilegt sé að Bjarni Benediktsson forsætisráðherra leiði flokkinn í gegnum kosningar þó hann mælist óvinsæll meðal kjósenda í skoðanakönnunum.

Guðlaugur og Þorbjörg Sigríður Gunnlaugsdóttir, þingmaður Viðreisnar, ræddu um stjórn ríkisfjármála og komandi þingkosningar sem verða þann 30. nóvember í Sprengisandi í dag. 

Töluvert fleiri vilja sjá Þórdísi Kolbrúnu Reykfjörð Gylfadóttur utanríkisráðherra eða Guðlaug Þór leiða Sjálfstæðisflokkinn í komandi kosningum í stað Bjarna Benediktssonar, formanns Sjálfstæðisflokksins, ef marka má skoðanakönnun Prósent sem var unnin fyrir hlaðvarpið Bakherbergið.

Fjöldi annarra flokka eigni sér hægri stefnu

Að mati Guðlaugs eru orðnar skýrari línur í stjórnmálunum núna en áður og segir hann að það verði kosið um hvort að samfélagið vilji hægri- eða vinstristjórn. 

„Hvort að við trúum því að einstaklingar hér fái að njóta sín og þá er ég að vísa til þess að við lækkum skatta, einföldum reglugerðir og einföldum líf fólks. Stöðugleiki í efnahagsmálum. Við erum svo sannarlega að kjósa um útlendingamálin, grænorkumálin, heilbrigðis- mennta- og samgöngumál.“

Guðlaugur segist hugsi yfir því að fjöldi flokka vilji eigna sér hægri stefnuna. Hann tekur fram að hann sjái það þó ekki gerast í verki. 

„Nú tröllríður öllu svör sem að formaður Samfylkingarinnar sendi á kjósanda í Reykjavík norður eins og ég skil málið. Þau vilja alls ekki sýna þann valkost sem er stjórn borgarinnar. Ef þetta fer eins og skoðanakannanir benda til þá erum við að horfa á það ríkisstjórnar mynstur í landstjórninni og það er bara mjög alvarleg staða.“

Sjö ára tilraunastarfsemi sem gekk ekki upp

Þorbjörg segir kosningarnar snúast um breytingar og vísar til ríkisstjórnar Sjálfstæðisflokksins, Framsóknarflokksins og Vinstri grænna sem sjö ára tilraunastarfsemi sem hefur ekki gengið upp samkvæmt skoðanakönnunum og almennri orðræðu. 

„Þessi slit Sjálfstæðisflokksins, að þau hafi komist að því eftir sjö ár að þau fýli ekki Svandísi Svavarsdóttur er ekki að skila sér lóðbeint í fylgisaukningu. Við sjáum það líka að allir flokkar í stjórnarandstöðu eru að bæta við sig fylgi.“

Hún segir fremstu kröfu kjósanda vera að komandi ríkisstjórn geti gengið í takt. Fólk vilji ríkisstjórn með sameiginlega stefnu sem geti náð árangri.

„Það sem að við erum að leggja upp með er að það þarf alvöru hagstjórn. Stóra verkefni er að ná niður verðbólgu og ná niður vöxtum. Staðan sé sú að fólk sem er með ágætis tekjur er að fresta því að setja ný dekk á bílinn og viðhalda húsnæði. Fólk með venjulegar og ágætis tekjur finnur fyrir þessari verðbólgu og upplifir að það þurfi alvöru ríkisstjórn sem gengur í takt til að ná henni niður.“

Lánablætið jaðri við spilafíkn

Með alvöru hagstjórn á Þorbjörg við samstarf þar sem er skýr sýn fyrir hendi. 

„Það þarf tiltekt í ríkisfjármálunum. Lánablæti þessarar ríkisstjórnar er þannig að það jaðrar við spilafíkn. Það þarf að horfa á heilbrigða forgangsröðun sem þýðir að við gerum minna af sumu og jafnvel sleppum einhverju til að gera meira af öðru. Við förum í það að greiða niður skuldir þannig að vaxtakostnaður sé ekki fjórði stærsti útgjaldaliður ríkisins. Það hefur áhrif á innviði og þjónustu.“

Þorbjörg bætir jafnframt við að vanræksla gagnvart geðheilbrigði, löggæslu og málefnum barna hafi skilað þeim ólgutímum sem ríkja núna. 

Segir Sjálfstæðisflokk óstjórntækan í borginni

„Ég held að megnið af því sem Þorbjörg sagði get ég verið sammála um þegar hún leggur áherslu á efnahagsstjórnina og stöðugleikann. Það sem er holur hljómur hjá Viðreisn er það sem að aftur Kristrún er hreinlega að segja, sá sem er búinn að stýra borginni og ber mesta ábyrgð í samstarfi við meðal annars Viðreisn, strokið hann út. 

Ég hef aldrei séð þetta áður. Við í Reykjavík finnum fyrir þessu. Ef við erum að tala um skuldir og skatta og við segjum að ríkisstjórnin stóð sig ekki nógu vel í þessum málaflokkum. Við erum hins vegar búin að lækka skatta um það sem nemur um 300 milljónum síðan við tókum við,“ segir Guðlaugur og segir ástandið verra í Reykjavíkurborg. 

Þorbjörg segist hjartanlega ósammála því að komandi kosningar snúist um Dag B. Eggertsson, fyrrverandi borgarstjóra, og ítrekar að leiðandi stef Sjálfstæðisflokksins sé að það sé alltaf allt öðrum að kenna en flokknum sjálfum.

„Ef við erum að nefna Sjálfstæðisflokkinn í borginni þá er það þannig að það er ofskaplega illa varðveitt leyndarmál og hefur verið til umræðu í fjölmiðlum nýlega að flokkurinn þar er óstjórntækur. Það skiptir ekki máli ef að Einar Þorsteinsson, vinnur kosningu eða Dagur B. allir flokkar komast að þeirri niðurstöðu, og meira að segja núna þegar þið eruð með oddvita sem er sæmilega fær í samskiptum að með henni sé einhver hópur sem lætur þannig að flokkurinn er óstjórntækur. Forysta flokksins hefur ekki viljað taka á þessu og afleiðingin er sú sem hún er.“