Hryðjuverkaríkið

Síonistar hafa nú gereytt megninu af Gaza, drepið tugi þúsunda og sært yfir hundrað þúsund, þar af er meiri hlutinn konur og börn. Aðferð þeirra til að sigrast á Hamas var sem sagt að sprengja svæðið í tætlur, gera það óbyggilegt og reka fólkið fram og aftur á meðan þeir láta vestrænum sprengjum rigna yfir það og drepa hvern sem fyrir verður. Í bráðum heilt ár hafa þeir stundað þetta meðan stjórnvöld Vesturlanda hafa, með nokkrum undantekningum, litið undan eða þagað þunnu hljóði og haldið áfram að senda vopn í síonísku drápsvélina sem beinist augljóslega gegn palestínsku þjóðinni.

Þetta er svo furðuleg hegðun að maður botnar bara ekkert í þessu. Hvernig er hægt að tala um mannréttindi, mál- og tjáningarfrelsi, Genfarsáttmála og sannarleg mannréttindabrot Rússa í Úkraínu, vitandi að allt er þverbrotið í Palestínu, öll mannréttindi? Þar eru nú stundaðar þjóðernishreinsanir, hóprefsingar, glæpir gegn mannkyni og þjóðarmorð allt af sömu stríðsmaskínunni sem haldið er uppi af Vesturlöndum og segist vera siðvæddasti her í heimi! Hvílík öfugmæli, hvílík firra!

Er von í Harris?

Kamala Harris sagði á dögunum að hún myndi halda áfram að senda vopn til Ísraels. Hvort þetta er pólitískt bragð til að hafa síonistana góða verður að koma í ljós. Það væri líklega ekki sérlega klók pólitík að segjast munu hætta þessum stuðningi þar sem gyðingar ráða svo miklu um það hver verður næsti forseti. Hún hefur sýnt að hún vill breytta stefnu gagnvart Ísrael. Hún sagði það hreint út í kappræðunum við Trump að hún vildi sjá aðra stöðu í Landinu helga þar sem stofnað væri sjálfstætt ríki Palestínumanna og öryggi þess og Ísraels væri tryggt. Þarna verður enginn friður fyrr en Palestínumenn hafa fengið sitt sjálfstæða ríki og losnað úr klóm Ísraels. Það vita allir sem vilja.

Barbarossa nútímans 

Þessi allsherjarútrýming minnir óþægilega á Operation Barbarossa, innrásina í Sovétríkin 1941. Hitler sagði hermönnum sínum margendurtekið að þeir væru að fara gegn óæðri kynþáttum, slövum, sígaunum, gyðingum, fólki sem ætti engan tilverurétt. Það er þessi orðræða gömlu kvalaranna sem hefur gegnsýrt fasistastjórn Bíbí Netanjahú. Þeir segja að þetta fólk hafi engan rétt til lífs, þetta séu dýr sem þurfi að slátra. Sama gildir nú um Vesturbakkann sem Gazasvæðið. Síonistar eru svo kokhraustir undir verndarvæng USA að þeir segja þetta jafnvel opinberlega. Og myndskeið sem hermenn hafa sjálfir tekið sýna síonistahermenn vanvirða og fótum troða eigur og íbúðir Palestínumanna.

Eyðilegging innviða 

Síonistar hafa eyðilagt flestalla skóla á Gaza, einnig heilbrigðiskerfið, bókasöfn, skólpkerfi, póstkerfi, öll þau kerfi önnur sem mynda innviði eins samfélags. Þeir hafa stundað stöðugar innrásir á Vesturbakkanum, yfirleitt á kvöldin og nóttunni. Þar fara þeir um rænandi, ruplandi og rífandi upp götur með jarðýtum, handtaka og drepa fólk. Þeir segjast vera að leita að Hamas. Sama segja þeir á Gaza. Svo sprengja þeir upp heilu hverfin og drepa tugi. Aldrei færa þeir fram nokkrar sannanir á því að Hamas hafi raunverulega verið þarna. Nei, nei, þeir eyða heilu flóttamannabúðunum á Gaza og drepa ótölulegan fjölda barna og kvenna og segja svo að þetta beinist að Hamas. Og svo eru þeir búnir að ræna landi út um allan Vesturbakkann. Stela stórum hlutum af því litla landsvæði sem Palestínumenn áttu eftir. Hundruðum saman hafa landránsbyggðirnar dreifst um allan Vesturbakkann í skjóli hersins siðvædda. Og landránsmenn ráðast á Palestínumenn reglulega með vopnum sem ráðherrar hafa gefið þeim. Já, þeir gáfu landránsmönnum vopn í haust sem leið til að þeir gætu „varið sig“. Allir sem vilja, vita að þeir hafa ekki þurft að verjast Palestínumönnum heldur er það þveröfugt.

Hryðjuverkaríkið Ísrael 

Það verður að segjast að Ísrael er orðið að hryðjuverkaríki! Með dyggum stuðningi Vesturlanda, aðallega Bandaríkjanna. Þessir aðilar þreytast ekki á því að kalla alla aðra hryðjuverkamenn; þar fara fremstir í flokki Hamas og svo koma Hesbollah, Hútar og efst trónir svo Íran. En þeir ættu að líta í eigin barm: Þau vestrænu ríki sem fjármagna og vopnvæða þjóðarmorðið í Palestínu, þau fjármagna þjóðarmorð hryðjuverkaríkisins. Því ef einhverjir standa virkilega undir nafni sem hryðjuverkamenn þá eru það síonistar sjálfir.

Nú skal það tekið fram að ekki allir gyðingar eru síonistar. Síonismi varð til sem hreyfing í lok 19. aldar í Evrópu. Hennar meginmarkmið var að stofna og byggja upp svokallað þjóðarheimili gyðinga. Margir gyðingar hafa verið á móti þessari ákvörðun. Síonistar í Ísrael hafa forðast að semja um nokkurn frið við þá íbúa landsins sem voru þar fyrir. Ef friður hefur verið í augsýn hafa menn eins og Begin, Sharon og Netanjahú komið í veg fyrir hann. Skýrasta dæmið er líklega Oslóarsamkomulagið sem Clinton átti þátt í að skapa 1993. Með því skyldu Ísraelsmenn viðurkenna PLO og PLO viðurkenna tilverurétt Ísraels. Síðan áttu Palestínumenn fá að stofna sjálfstætt ríki á fimm árum. Að leiða saman menn eins og Arafat og Rabín þáv. forsætisráðherra Ísraels og láta þá takast í hendur þótti þrekvirki á sínum tíma. Síonistar gerðu það samkomulag að engu með því að drepa Rabín! Þeir drápu eigin forsætisráðherra!

Nacba II í boði Vesturlanda 

Stórum hluta almennings jarðkringlunnar er gersamlega misboðin framkoma Ísraels og þögn vestrænna ríkja og vopnavæðing þjóðarmorðsins. Það sést til dæmis vel á samfélagsmiðlum. Auðvitað var innrás Hamas í Ísrael hryllileg þó að atburðirnir hafi verið ýktir mjög. En eins og Guterres hjá SÞ benti á strax í haust sem leið, þá var þessi innrás ekki upphafið að neinu. Á undan henni var 17 ára einangrun Gaza-svæðisins, tæplega 60 ára hernám Ísraels á Palestínu og rúm 75 ár liðin frá stofnun Ísraels þegar heilli þjóð var ýtt til hliðar til að rýma fyrir þjóðarheimili gyðinga og meira en 750 þúsund manns urðu að flýja heimili sín! Þetta fólk settist að í nágrannalöndunum og á Gaza. Það hefur EKKI fengið að snúa heim. Þetta er það sem Palestínumenn kalla Nacba eða hörmungarnar. Það þjóðarmorð og útrýming sem nú stendur yfir kalla þeir Nacba II eða hörmungarnar síðari. Þær standa nú yfir í boði stjórnvalda USA og margra annarra Vesturlanda.

Höfundur er tónlistarmaður.