Ritaði ítar­­lega grein um Gylfa Þór: „Ís­­lenska þjóðin í hans horni“

Gylfi Þór er vel þekktur á Bretlandseyjum eftir tíma sinn þar sem atvinnumaður með liðum á borð við Tottenham, Everton, Reading og Swansea City þar sem að hann gerði góða hluti.

En mál utan vallar setti strik í reikninginn á veru hans þar en sumarið 2021 var Gylfi Þór handtekinn, grunaður um brot gegn ólögráða einstaklingi. Rannsókn málsins stóð yfir í 637 daga áður en það var svo greint frá því í apríl í fyrra að Gylfi Þór yrði ekki ákærður vegna málsins.

Í grein  The Athletic sem birtist í morgun og er rituð af blaðamanninum Daniel Taylor, er meðal annars rætt við menn á borð við Åge Hareide, landsliðsþjálfara Íslands, Viðar Halldórsson, formann FH og Börk Edvardsson formann knattspyrnudeildar Vals.

Eftir að ljóst varð að Gylfi Þór yrði ekki ákærður fór hann í það að koma knattspyrnuferlinum aftur af stað. Hann samdi við danska úrvalsdeildarfélagið Lyngby og lék þar undir stjórn Freys Alexanderssonar um stutta hríð áður en að leið hans lá svo heim til Íslands þar sem að Gylfi samdi við og leikur nú með liði Vals.

Hvar fengi hann betri móttökur?

Daniel Taylor, gerði sér ferð hingað til lands á dögunum í kringum landsleik Íslands og Svartfjallalands í Þjóðadeild UEFA og í viðtali við Guðmund Aðalstein Ásgeirsson, blaðamann Fótbolti.net, sagði hann enn mikinn áhuga á sögu Gylfa Þórs á Bretlandseyjum

Eftir veru sína hér á landi skrifar Daniel að góðar ástæður séu fyrir því af hverju Gylfi Þór, sem varð 35 ára um nýliðna helgi, ákvað að halda aftur til Reykjavíkur.

„Til nyrstu höfuðborgar í heimi, eftir að hafa síðast leikið fyrir Everton árið 2021, ári áður en samningur hans við félagið rann sitt skeið. Fjarvera sem hefur aldrei að fullu verið útskýrð. Hvar annars staðar myndi hann til dæmis fá eins góðar móttökur?“ skrifar Daniel um heimkomu Gylfa.

Börkur Edvardsson, formaður knattspyrnudeildar Vals, lýsir skiljanlega happi yfir því að Gylfi Þór hafi endað hjá félaginu þrátt fyrir möguleikar Valsmanna á að standa uppi sem Íslandsmeistarar á yfirstandandi tímabili séu úr sögunni

„Þessi félagsskipti áttu bara að eiga sér stað,“ segir Börkur við The Athletic. „Þetta er auðvitað töluvert öðruvísi umhverfi en hann hefur vanist hjá liðum á borð við Tottenham og Everton en við erum þó að bjóða upp á meira fjölskylduvænna umhverfi. Gylfi hefur fundið jafnvægi í sínu lífi og ég held að hann sé ánægður hér.

Ég er viss um að hann gæti enn verið að spila í ensku úrvalsdeildinni. Hann er það góður. En honum líður vel hér, er ánægður hjá val. Hann vill vera hér með fjölskyldu sinni og eiga venjulegt líf.“

Þó svo að Daniel Taylor telji ólíklegt að stytta verði reist af Gylfa Þór fyrir utan Laugardalsvöll, líkt og gert var í tilfelli Alberts Guðmundssonar, fyrsta atvinnnumanni Íslands í fótbolta, segir hann eitt alveg kýrskýrt.

„Íslenska þjóðin er tvímælalaust í horni Gylfa Þórs. Og kannski, í hans tilfelli, er það bara nóg.“

Gylfi Þór Sigurðsson er núna staddur með íslenska landsliðinu í Tyrklandi og á liðið krefjandi leik fyrir höndum gegn heimamönnum í Þjóðadeild Evrópu í kvöld. 

Leikur Tyrklands og Íslands hefst klukkan 18:45 í kvöld og verður hann sýndur í beinni útsendingu og í opinni dagskrá á Stöð 2 Sport. Upphitun fyrir leikinn hefst hálftíma fyrr, klukkan 18:15.