Raygun segir að hatrið hafi verið hrika­legt

Gunn, betur þekkt sem Raygun, er ein af stærstu nöfnunum frá Ólympíuleikum í París þrátt fyrir að hafa náð engum árangri í sinni íþrótt. Öll athyglin er langt frá því að vera bara jákvæð því hún og fjölskyldan hafa þurft að upplifa ýmislegt á síðustu vikum.

Óvenjulegur breikdans Ástralans sló í gegn á netinu þar sem sporin sem hún bauð upp á hafa verið endalaus uppspretta brandara á netinu.

Undirskriftalisti

Það sem verra er að hún hefur orðið fyrir miklu áreiti og einhverjir Ástralar settu síðan af stað undirskriftalista þar sem krafist er að bæði Raygun og Anna Meares, yfirstýra Ólympíuliðs Ástrala á leikunum, biðjist afsökunar á frammistöðu breikdansarans á Ólympíuleikunum.

„Við heimtum afsökunarbeiðni frá Rachel Gunn og Önnu Mears fyrir að afvegaleiða ástralskan almenning, reyna að gaslýsa fólk og grafa undan alvöru íþróttafólki,“ segir meðal annars í texta undirskrifarlistans.

Raygun ákvað á endanum að biðla til fjölmiðla um að hætta áreitinu og ýta með því undir eineltið á netinu. Hún tók upp myndband og setti það inn á samfélagsmiðla sína.

Áttaði sig á ekki því

„Ég vil byrja á því að þakka þeim öllum fyrir sem hafa stutt við bakið á mér. Ég kann að meta ykkar jákvæðu strauma og er ánægð með að hafa getað komið með smá gleði inn í líf ykkar. Ég gerði mér vonir um að það,“ sagði Raygun.

„Ég áttaði mig hins vegar ekki á því að ég myndi einnig opna dyrnar fyrir svo miklu hatri. Hatrið hefur hreinlega verið hrikalegt. Ég fór á leikana og skemmti mér. Ég tók þetta samt mjög alvarlega og lagði mikið á mig við undirbúninginn fyrir leikana. Ég gaf allt mitt og er stolt af því að hafa verið hluti af ástralska Ólympíuliðinu,“ sagði Raygun.

Hún segir falsfréttir um að hún hafi svindlað sér inn á Ólympíuleikana eiga sér enga stoð í raunveruleikanum og bendir á yfirlýsingu frá ástralska Ólympíusambandinu.

Ein fyndin staðreynd fyrir ykkur

Hún vildi líka koma einu á hreint. „Hér er ein fyndin staðreynd fyrir ykkur. Það eru engin stig gefin í breikdansi,“ sagði Raygun og sagði áhugasömum að þeir gætu séð samanburðinn á henni og andstæðingum hennar á úrslitasíðu Ólympíuleikanna. Mikið var gert úr því að hún hefði ekki fengið eitt stig á leikunum en það er ekki rétt því engin stig eru gefin. Hún vann aftur á móti enga viðureign.

Raygun er í fríi í Evrópu í nokkrar vikur og ætlar að vera þar á meðan hún jafnar sig á Ólympíuævintýrinu.

Biður um frið fyrir sitt fólk

„Ég biðla nú til blaðamanna að hætta að áreita fjölskyldu mína, vini mína, ástralska breiksambandið og allt götudanssamfélagið í heild sinni. Allir hafa gengið í gegnum mikið vesen vegna alls þessa. Ég bið um að þau fái frið og að þið virðið þeirra einkalíf,“ sagði Raygun.

Meðal þeirra sem hefur komið fram og fordæmt fyrrnefndan undirskrifarlista er Anthony Albanese, forsætisráðherra Ástralíu. Hann kallaði hann tilefnislausan og illkvittnislegan.

Það má sjá myndbandið með Raygun hér fyrir neðan.