Bylgju­lestin í bongó­blíðu á Þing­völlum

Bragi Guðmunds og Kristín Ruth stóðu vaktina á laugardag en Kristín mætti á Þingvelli í stórglæsilegum þjóðbúningi og vakti verðskuldaða athygli. 

Agnes Ýr var á vettvangi og afhenti Öskjupoka með glaðningi frá Bylgjunni og samstarfsaðilum auk þess sem hún stjórnaði sandpokakasti þar sem hægt var að næla sér í flotta vinninga.

„Svo kíktu skemmtilegir gestir í Bylgjubílinn eins og venjulega,“ sagði Bragi. „Einar Bárðarson var einn þeirra og sagði okkur frá frábærri „mosakenndri“ tónlistarveislu á glænýju sviði sem búið er að koma upp á Valhallarreitnum og fellur vel að umhverfinu. Trúbadorarnir Arnþór og Bjarki tóku sumarsmellinn „Kyssumst í alla nótt“ og frumfluttu að auki glænýtt lag. Svo slógum við á þráðinn til Bubba Morthens sem var að gera sig kláran fyrir síðustu sýninguna af 9 líf.“

Einar Á. E. Sæmundsen þjóðgarðsvörður mætti líka í heimsókn og sagði hlustendum frá glæsilegri dagskrá á Þingvöllum þessa þjóðhátíðarhelgi sem samanstóð af lýðveldis- og skógargöngum um söguslóðir, leiksýningum og söng, fornleifaskóla fyrir börnin og heilmiklu fleira.

„Þetta var frábær dagur á Þingvöllum,“ sagði Bragi að lokum.

Um næstu helgi, laugardaginn 22. Júní, verður Bylgjulestin á Jónsmessuhátíðinni á Eyrarbakka.

Næstu stopp Bylgjulestarinnar:

• 22. júní - Eyrarbakki
• 29. júní – Borgarnes
• 6. júlí – Akureyri
• 13. júlí – Selfoss
• 20. júlí – Hljómskálagarðurinn í Reykjavík
• 27. júlí - Hafnarfjörður