Breiðablik-Víkingur: Rígurinn sem reisti deildina upp frá dauðum

Breiðablik og Víkingur eru auðvitað nágrannar sitt hvoru megin við Fossvoginn og rígur erkifjendanna hefur átt sínar hæðir og lægðir gegnum árin. Félögin voru lengi vel miklir keppinautar, fóru margoft upp eða niður um deild á sama eða svipuðum tíma í gegnum 10. áratuginn og upphaf 21. aldarinnar. Löng saga sem verður ekki reifuð til mergjar í svo stuttu máli. 

Það má segja að þessi áratuga gamli rígur hafi loks komið aftur almennilega saman þegar þörfin var mest árið 2021 og kjarnaðist í gríðarlega dramatískri titilbaráttu sem reisti íslenskan fótbolta við eftir að hafa lagst til hvílu árið á undan vegna Covid.

Valur hafði vermt toppsætið lengst af móti en Breiðablik vann fimm leiki í röð í gegnum 15.-20. umferð og sat fyrir ofan Víking með tveggja stiga forskot á toppnum þegar tveir leikir voru eftir.

Í 21. umferðinni átti Víkingur erfiðan útileik við þriðja sætis liðið KR og Breiðablik heimsótti FH.

Lokamínútur þeirra leikja eru mörgum mjög eftirminnilegar og það voru vítaspyrnur sem réðu örlögum. Breiðablik var marki undir en fékk tækifæri til að jafna á 76. mínútu, Árni Vilhjálmsson steig á punktinn og skaut yfir.

Víkingar komust 2-1 yfir gegn KR, sem fékk vítaspyrnu og tækifæri til að jafna á lokasekúndum leiksins, en Ingvar Jónsson varði vítið og svo gott sem tryggði Víkingum titilinn. Þeir komust þarna stigi yfir Breiðablik, kláruðu svo falllið Leiknis í næstu umferð og urðu Íslandsmeistarar.

Stuðningsmenn líktu sigrinum sem alsælu og sögðu erfiða þrjá áratugi að baki.

Breyttir tímar í þeirri Bestu

Þegar Besta deildin var sett á laggirnar tímabilið 2022 efaðist enginn um hvaða tvö lið myndu keppa um titilinn. 

Það fór reyndar svo að Breiðablik rúllaði deildinni upp og var snemma komið langt á undan öllum öðrum. Segja má að yfirburðir þeirra þetta tímabilið hafi verið staðfestir strax í 6. umferð þegar Breiðablik mætti í Fossvoginn og gjörsigraði ríkjandi Íslandsmeistarana 3-0.

Litlir hundar sem gelta hátt

Á næsta tímabili 2023 mættu Víkingar blóðheitir til leiks eftir niðurlægjandi titilvörn þar sem Breiðablik gjörsamlega valtaði yfir mótið. 

Ákefðin í liðinu jókst til muna frá árinu á undan og ljóst var að Víkingum dugði ekki bara Íslandsmeistaratitill, heldur ætluðu þeir sér að hefna fyrir algjöra yfirburði Breiðabliks tímabilið á undan. 

Liðin mættust undir ljósunum á Kópavogsvelli föstudagskvöldið 2. júní. Víkingur var 2-0 yfir lengi en Blikar jöfnuðu metin undir blálokin og gjörsamlega allt sauð upp úr. 

Orðsendingar manna á milli voru miklar eftir leik. Óskar Hrafn sagði Víkinga hafa hagað sér „eins og fávitar allan leikinn“  og Höskuldur Gunnlaugsson kallaði Víkinga  litla hunda sem gelta hátt. Þá er auðvitað eftirminnileg ræðan sem Arnar Gunnlaugsson hélt eftir leik þar sem hann hellti sér yfir Ívar Orra dómara og sagði hann ömurlegan. 

Skeytasendingar milli stuðnings- og leikmanna liðanna héldu áfram allt sumarið og óhætt er að segja að fólk hafi beðið í ofvæningi eftir seinni leiknum. 

Þá var svo í pottinn búið að Breiðablik átti lítinn möguleika á titlinum sem var við það að renna í greipar Víkinga. Hins vegar var Breiðablik í frábærum séns að komast í Sambandsdeildina og óskaði eftir að leikurinn yrði færður til að minnka leikjaálag fyrir mikilvægt umspil. Víkingar höfnuðu þeirri beiðni. 

Það hrundi af stað alveg afskaplega furðulegri atburðarás. Breiðablik skilaði ekki inn leikskýrslu á réttum tíma og hótuðu því hreinlega að mæta ekki til leiks.

Daniel Dejan Djuric sagði eftirminnilega að hann væri uppalinn Bliki og kannaðist við þessi trúðslæti. 

Stúkan fór svo að sjálfsögðu vel yfir málið og sýndi frá því þegar Blikar mættu loksins rétt áður en leikurinn fór af stað. Velkunnir byrjunarliðsmenn gengu þar út í borgaralegum klæðum og Blikar spiluðu með hálfgert varalið í leiknum, sem tapaðist 5-3. 

Leikur dagsins 

Liðin hafa mæst einu sinni áður á þessu tímabili, leiknum lauk með öruggum 4-1 heimasigri í Víkinni. Leikurinn í dag fer fram á Kópavogsvelli og er hluti af 14. umferð en var flýtt vegna þátttöku beggja liða í Evrópuundankeppni. 

Líkt og undanfarin ár má gera ráð fyrir smekkfullri stúku og sturlaðri stemningu. Víkingur situr í efsta sæti deildarinnar en Blikar eru að koma aftan að þeim, þremur stigum frá og geta með góðum sigri í kvöld tyllt sér í toppsætið. Þá hefur fyrrum Blikinn Daniel Dejan Djuric byrjað mótið stórkostlega og er sem stendur næst markahæstur í deildinni með fimm mörk. 

Hverju sem veldur má reikna með hörkuleik tveggja toppliða sem munu ekkert gefa eftir. 

Leikur Breiðabliks gegn Víkingi hefst klukkan 20:15 og verður í beinni textalýsingu á Vísi.  Bein útsending á Stöð 2 Sport fer í loftið 19:50. Klukkan 18.00 hefst aftur á móti leikur Vals og Stjörnunnar.