Tveimur leikjum frá ó­dauð­leika

Spánverjinn Xabi Alonso hefur stýrt Leverkusen til magnaðs árangurs á yfirstandandi leiktíð. Félagið vann sinn fyrsta Þýskalandsmeistaratitil í sögunni og fór taplaust í gegnum deildarkeppnina.

Úrslitaleikur Leverkusen og Atalanta er klukkan 19:00 í kvöld. Hann verður sýndur beint á Stöð 2 Sport 2.

Það sem meira er hefur liðið ekki tapað einum einasta fótboltaleik, hvort sem er í þýska bikarnum eða Evrópudeildinni. Áður en kemur að bikarúrslitum við 2. deildarlið Kaiserslautern um helgina er það úrslitaleikur Evrópudeildarinnar við sterkt lið Atalanta frá Ítalíu í kvöld.

„Það er mikil spenna, en starfið mitt er bara fyrir leik,“ sagði Alonso á blaðamannfundi í gær fyrir leik kvöldsins.

„Þegar boltinn fer að rúlla eru það bara leikmennirnir. Við höfum verið að búa okkur undir svona augnablik í allan vetur, það er ekki bara tveggja daga dæmi. Sem betur fer er ég með frábært lið,“

„Leikmennirnir eru vel undirbúnir, við höfum sýnt það í vetur og þessi leikur verður ekkert öðruvísi. Við berum mikla virðingu fyrir Atalanta en við erum fullir sjálfstrausts,“ segir Alonso.