Rooney sakar meidda leik­menn United um að vilja ekki spila

United tapaði sínum fjórtánda leik í ensku úrvalsdeildinni þegar Arsenal sótti sigur á Old Trafford í gær, 0-1.

Mikil forföll eru í liði United vegna meiðsla. Rooney segir þó að sumir af meiddu leikmönnunum geti vel harkað af sér og spilað en vilji það ekki.

„Sumir af þessum leikmönnum geta spilað, hundrað prósent. En vegna þess að þeir hafa fengið gagnrýni er auðvelt að sitja hjá og bíða eftir bikarúrslitaleiknum og gera sig klára fyrir EM,“ sagði Rooney á Sky Sports í gær.

„Ég hef séð þetta sjálfur í gegnum árin. Leikmennirnir sem eru meiddir eru ekki að baða sig í neinum dýrðarljóma núna og stjórinn tekur sökina á sig.“

United er í 8. sæti ensku úrvalsdeildarinnar. Liðið mætir Newcastle United og Brighton í síðustu tveimur deildarleikjum sínum á tímabilinu.