Segir ekki satt að hann sé búinn að semja við Liverpool

Amorim segir ekkert til í þeim fréttum um að hann væri búinn að samþykkja að taka við starfi Jürgen Klopp hjá Liverpool. Sky í Þýskalandi sló því upp í vikunni að Amorim og Liverpool væri búin að gera munnlegt samkomulag.

„Ég hef ekki farið í viðtal hjá neinu félagi og það er ekkert samkomulag til. Þetta er í síðasta skiptið sem ég mun ræða mína framtíð,“ sagði Amorim pirraður.

„Það eina sem ég hugsa um er að vinna titilinn með Sporting. Ekkert mun breytast,“ sagði Amorim.

Sporting er í efsta sæti portúgölsku deildarinnar og er með fjögurra stiga forskot á Benfica þegar sjö umferðir eru eftir.

Klopp tilkynnti í janúar að hann myndi hætta með Liverpol í sumar. Hann hefur verið knattspyrnustjóri Liverpool frá því í október 2015.