Bætir í vind og úr­komu í nótt

Í hugleiðingum veðurfræðings segir að það verði dálítil él eða skúrir á víð og dreif á landinu, en ætti að rofa til norðanlands og sjást vel til sólar.

Hiti verður á bilinu null til sjö stig og mildast sunnanlands.

Í nótt nálgast lægð úr suðri og úrkomusvæði hennar færist yfir landið, því bætir í vind og úrkomu.

Á morgun er spáð austan 8-15 og víða slydda eða snjókoma, en rigning á sunnanverðu landinu. Hlýnar lítillega. Vindur á að verða norðlægari um kvöldið og styttir þá upp að mestu sunnantil á landinu.

Á föstudag er síðan spáð norðanátt með ofankomu, einkum fyrir norðan og kólnar aftur í veðri. Ef rýnt er í kortin lengra fram í tímann, þá er spáð kuldatíð fram í næstu viku.

Veðurhorfur á landinu næstu daga

Á fimmtudag: Austan 8-15 m/s og slydda eða snjókoma, en rigning á sunnanverðu landinu. Hiti frá frostmarki í innsveitum fyrir norðan, upp í 8 stiga hita syðst. Norðlægari um kvöldið og styttir upp sunnantil.

Á föstudag: Norðan 8-15. Snjókoma á norðanverðu landinu, slydda á Suðausturlandi, en þurrt að kalla suðvestantil. Vægt frost fyrir norðan, en allt að 5 stiga hiti sunnanlands yfir daginn.

Á laugardag: Hæg breytileg átt. Bjart með köflum og yfirleitt þurrt, en líkur á snjókomu suðaustanlands. Frost 0 til 10 stig.

Á sunnudag: Norðlæg átt og dálítil él, en bjartviðri sunnan heiða. Kalt í veðri.

Á mánudag og þriðjudag: Norðlæg eða breytileg átt, skýjað með köflum og stöku él. Áfram frost um allt land.