Vill stjórn­völd í lið með sér frá fyrsta degi

Miðstöð menntunar og skólaþjónustu kemur í stað Menntamálastofnunar sem var lögð niður en miðstöðin er liður í menntastefnu stjórnvalda til 2030. Þórdís Jóna Sigurðardóttir, forstjóri Miðstöðvarinnar, segir nýja stofnun fyrst og fremst þjónustu- og þekkingarstofnun.

„Henni er ætlað það lykilhlutverk að vera traust bakland skólastarfs á íslandi og það sem er nýtt í þessu er þessi þjónustumiðaða nálgun. Við þjónustum bæði með stuðningi og ráðgjöf við skólastarf meðal annars með námsgagnaútgáfu að námsefni sé aðlagað hverju og einu barni. Þá bjóðum við upp á matsferil þar sem hægt verður að meta bæði stöðu og framfarir hjá barni. Við sjáum fyrir okkur að ný stofnun muni vera sterkara bakland fyrir skólastarfið og með fleiri tæki og verkfæri til að aðstoða kennara.“

Þórdís bendir á að þegar stöðumat barnanna liggi fyrir þurfi tæki og tól til að bregðast við sem henti hverju barni.

„Þá sé hægt að bjóða það námsefni sem sé við hæfi þannig að framfarirnar verði meiri og líka bara með þau börn sem eiga mjög auðvelt með að læra og vilja fá meira krefjandi efni. Þetta er klárlega okkar framtíðarsýn sem við stefnum að. Við viljum mæta kennurum sem hafa þessa ofboðslega miklu breidd inni í skólastofunni hjá sér.

Vill að stjórnvöld standi með Miðstöðinni

Eftir niðurstöður alþjóðlegu PISA könnunarinnar sögðu fjölmargir sérfræðingar innan menntakerfisins að ráðast þyrfti í endurnýjun á námsgagnaútgáfu.

„Okkur langar til að sjá að stjórnvöld standi með þessari nýju stofnun og gefi verulega í þannig að námsgögnin séu þannig að það sé á einfaldari hátt hægt að aðlaga að ólíkum þörfum og það þarf líka að vera til miklu meira magn af fjölbreyttum námsgögnum. Eitt eru auðvitað þessar klassísku bækur sem eru nauðsynlegar en líka starfræn nálgun; gagnvirka námsefnið og allt það.“

Stöðumat nauðsynlegt

„Við sáum líka varðandi PISA að auðvitað þyrstir skólana í að vita hver staðan er hjá hverjum og einum og þrátt fyrir að PISA sé ekki þess eðlis að hægt sé að brjóta niðurstöðurnar niður hér á Íslandi þá þurfum við að vera miklu betri í því að vita bæði hver staðan er og líka hvernig framfarirnar eru hjá barni varðandi lesskilning, stærðfræði og lesfimi sem við verðum að vera miklu betri í að gera.“ 

Þar komi skimunarpróf sterk inn.

Þórdís segist full tilhlökkunar að takast á við nýja nálgun í skólamálum.

„Það var auðvitað heilmikið samráð haft við helstu hagaðila um mótun á þessari stofnun þannig að við erum bara full tilhlökkunar að taka samtalið og við ætlum að halla okkur fram og vera til þjónustu reiðubúin fyrir skólasamfélagið.“

Hér að neðan er hægt að horfa á Pallborðsþátt í tveimur hlutum um menntamál á Íslandi eftir að niðurstöður alþjóðlegu PISA-könnunarinnar voru birtar í desember.