Hall­dór slapp við fall og úrslitakeppnin klár

Nordsjælland tapaði reyndar á útivelli gegn lærisveinum Guðmundar Guðmundssonar í Fredericia, 31-26, eftir að hafa komist fjórum mörkum yfir snemma í seinni hálfleik, en enduðu stigi fyrir ofan Lemvig-Thyborön sem féll.

Einar Þorsteinn Ólafsson skoraði tvö mörk úr tveimur skotum fyrir Fredericia sem hafði þegar tryggt sér 2. sæti deildarinnar, og þar með sæti í Evrópukeppni á næstu leiktíð, í fyrsta sinn.

Nordsjælland var 13-11 yfir í hálfleik í dag og komst í 15-11, en Fredericia komst svo yfir þegar Einar stal boltanum og kom honum fram í hraðaupphlaup. Einar stal boltanum aftur í stöðunni 26-24, og hjálpaði Fredericia að komast þremur mörkum yfir, og munurinn í lokin var fimm mörk.

Deildarmeistararnir brugðust ekki

Deildarmeistarar Aalborg unnu hins vegar á sama tíma Lemvig-Thyborön, 35-28, eftir að staðan var jöfn í hálfleik, 15-15.

Lemvig endaði því neðst í deildinni og féll, en Nordsjælland fer í neðri úrslitakeppni deildarinnar. Þar spila liðin sem enduðu í 9.-13. sæti einfalda umferð, og er Nordsjælland eina liðið sem tekur engin stig með sér. SAH og Sönderjyske enduðu í 9. og 10. sæti og taka tvö stig með sér, en Holstebro og Kolding enduðu í 11. og 12. sæti og taka eitt stig með sér.

Neðsta liðið af þessum fimm fer í umspil við lið úr næstefstu deild um sæti í úrvalsdeildinni á næstu leiktíð.

Ljóst hvaða lið mætast í úrslitakeppninni

Holstebro, liðið sem Arnór Atlason stýrir, tapaði 34-29 á útivelli gegn SönderjyskE í dag.

Markvörðurinn Ágúst Elí Björgvinsson og Elvar Ásgeirsson urðu einnig að sætta sig við tap með Ribe-Esbjerg, 30-27, á útivelli gegn Ringsted. Ágúst varði 7 af 20 skotum sem hann fékk á sig, og Elvar skoraði eitt mark.

Í átta liða úrslitakeppni efstu liða deildarinnar er spilað í tveimur fjögurra liða riðlum. Aalborg (1. sæti), Bjerringbro-Silkeborg (4. sæti), Mors-Thy (5. sæti) og Ribe-Esbjerg (8. sæti) eru saman í riðli, en Fredericia, GOG, Skjern og Ringsted í hinum riðlinum. Aalborg og Fredericia taka með sér tvö stig úr deildakeppninni, en GOG og Skjern eitt stig hvort. Önnur byrja úrslitakeppnina án stiga.