Sigga Lund og Vala Ei­ríks kveðja Bylgjuna fullar þakk­lætis

Valdís, sem flestir þekkja sem Völu, segist kveðja Bylgjuna eftir níu ára platónskt ástarsamband. Hún hefur eðal annars verið á tökkunum í Bítinu undanfarin ár, sungið með Guðrúnu Árnýju á föstudögum í þætti Ívars Guðmundssonar, verið með hina ýmsu þætti og verið gestgjafi í sjónvarpsþáttunum Bylgjan órafmögnuð.

„Ég hef sinnt alls kyns störfum innan raða fyrirtækisins s.l. næstum því áratug, en tilvalið að hefja fertugsaldurinn á uppstokkun. Það var reyndar planið að kveðja á eigin forsendum eftir slétta viku, svo það er enginn heimsendir, betra ég en einhver annar,“ segir Vala.

Hún segist ætla að skapa meira, leika sér og láta drauma sína rætast. Fólk muni heyra í henni á öðrum vettvangi fljótlega en fyrst fari hún í smá frí. Hún þakkar vinnufélögum fyrir lærdóminn, vináttuna en fyrst og fremst hlustendum sínum.

„Takk fyrir að hlusta á mig og vera með mér svona lengi. Þið eruð mér svo dýrmæt.“

Sigga segist ganga frá borði full þakklætis, þakklát fyrir Bylgjuna og tækifærin sem hún hafi fært henni.

„Þakklát fyrir allt fólkið sem ég hef fengið að vinna með, Þvílíkir snillingar. Þakklát fyrir hlustendur, sem eru svo langbestir,“ segir Sigga.

„Ég er líka bara svo þakklát fyrir þennan kafla sem er lokið. Hann var athyglisverður og mjög svo lærdómsríkur. Hann gaf mér færi á að vaxa heilan helling. Ég hlakka til næsta kafla, og þeysi af stað hvergi banginn. Ég hef aldrei verið betri og ég veit það, það er herslumunurinn,“ segir Sigga og kveður vinnufélaga, gesti og hlustendur með þakklæti.

Fram kom á Vísi í gær að ellefu starfsmönnum Sýnar hefði verið sagt upp. Uppsagnirnar hefðu dreifst á svið fyrirtækisins.

Vísir er í eigu Sýnar.