Gengur á með strekkingi eða all­hvössum vindum og smá vætu

Á vef Veðurstofunnar segir að það gangi á með sunnanstrekkingi eða allhvössum vindum og smá vætu, en að hægara og yfirleitt bjartviðri sé á Norður- og Austurlandi.

Gera má ráð fyrir hita á bilinu þrjú til ellefu stigum, þar sem hlýjast er fyrir norðan.

„Suðlægari og bætir í úrkomu á morgun, fimmtudag, jafnvel talsverð úrkoma suðvestantil seinnipartinn, en þurrt að mestu eystra.“

Veðurhorfur á landinu næstu daga

Á fimmtudag: Sunnan 10-15 m/s, en að 20 m/s í vindstrengjum vestantil. Talsverð rigning víða um land, en þurrt að kalla norðaustanlands. Hiti 1 til 6 stig.

Á föstudag: Vestlæg átt, 8-13 m/s og stöku skúrir eða slydduél, en úrkomulaust að kalla eystra. Hiti 0 til 5 stig. Norðlægari vindur norðanlands um kvöldið og kólnar í veðri.

Á laugardag: Norðlæg átt, 8-13 m/s og dálítil él á víð og dreif. Frost 0 til 10 stig, kaldast norðaustanlands, en frostlaust syðst.

Á sunnudag: Norðlæg eða breytileg átt og dálítil él norðan- og austanlands, en annars bjart með köflum og talsvert frost um land allt.

Á mánudag og þriðjudag: Útlit fyrir ákveðna norðanátt með snjókomu eða éljum, en bjartviðri sunnan- og vestanlands. Áfram kalt í veðri.