Segir lögin hafa verið alveg skýr um af­drif þjónustu­lausra hælis­leit­enda

Greint var frá því á vef félags- og vinnumarkaðsráðuneytisins í morgun að ráðuneytið hafi gert samkomulag við Rauða krossinn um tímabundið verkefni sem feli í sér neyðaraðstoð við útlendinga, sem fengið hafa endanlega synjun á umsókn sinni um alþjóðlega vernd hér á landi og eigi ekki rétt á aðstoð. Verkefnið gildir út maí næstkomandi.

„Ég er mjög ánægður með að við höfum tryggt núna að ekkert af fólkinu þarf að sofa úti. Enda er það eitthvað sem við viljum ekki í okkar samfélagi. Þetta tryggjum við með samningi við Rauða krossinn sem snýst um að þau veita ákveðna þjónustu sem felst í að fólk fær húsaskjól og mat í samræmi við hvernig þetta er gert í gistiskýlum,“ segir Guðmundur Ingi Guðbrandsson, félags- og vinnumarkaðsráðherra.

Er pláss fyrir þetta fólk í gistiskýlunum?

„Við vitum ekki hversu mörg munu óska eftir að nota þetta. Það þarf að þróast eftir því sem tíminn líður. Það er ekki meiningin að það verði lokað á neinn úr þessum hópi. Okkur stjórnvöldum ber - sveitarfélögum og eftir atvikum ríki - að tryggja það að hér sé enginn á götunni,“ segir Guðmundur. 

Framkvæmdin ekki nógu vel hugsuð

Hann segir útfærsluna í höndum Rauða krossins og geti því ekki svarað hvort rúmum verði fjölgað í gistiskýlum.

Þessi hópur hefur ekki rétt á þjónustu vegna breytinga sem til komu með nýjum útlendingalögum síðasta vetur. Lögin hafa verið harðlega gagnrýnd að undanförnu. 

Voru þessi útlendingalög nógu vel úthugsuð ef þetta er niðurstaðan?

„Ég held að eins og gengið var frá lögunum var það alveg skýrt. En ég hef gagnrýnt að framkvæmdin á því hvað tekur við þegar fólk nýtur ekki lengur þjónustu Ríkislögreglustjóra að það hafi Ríkislögreglustjóri og dómsmálaráðuneytið ekki hugsað alveg nógu langt,“ segir Guðmundur. 

„Auðvitað er hlutverk sveitarfélaganna augljóst í þessu því að þeim ber að skoða þessi mál einstaklinganna og við höfum núna búið til úrræði sem þau geta vísað beint í. Af því að það eru ekki til nein svona úrræði í sveitarfélögunum eins og staðan er núna. Við erum að óska eftir góðu samstarfi við sveitarfélögin núna.“

Segir þjónustuna nú í höndum sveitarfélaga

Heiða Björg Hilmisdóttir formaður Sambands Íslenskra sveitarfélaga segir í samtali við fréttastofu að sambandið hafi málið og samkomulagið nú til skoðunar. Afstaða sveitarfélaganna hafi verið skýr og hún sé óbreytt. 

Fram kemur í tilkynningu ráðuneytisins að það hafi gert breytingar á reglum um endurgreiðslur til sveitarfélaga vegna áðurnefndra einstaklinga. Með breytingunum sé skýrt hvað komi til endurgreiðslu úr ríkissjóði vegna aðstoðar sveitarfélaga við fólkið.

„Sveitarfélögin taka auðvitað alltaf ákvörðun um hversu mikla þjónustu þau veita. Við erum að segja að við endurgreiðum fyrir þjónustu sem er í samræmi við það sem gengur og gerist í gistiskýlum.“