Rigning með köflum á suð­austan- og austan­til

Í hugleiðingum veðurfræðings á vef Veðurstofunnar segir að í öðrum landshlutum verði þurrt og allvíða bjart.

Hiti verður á bilinu sjö til fjórtán stig yfir daginn.

„Fremur hæg suðvestlæg eða breytileg átt á morgun og væta með köflum víða um land þegar líður á daginn, en þurrt að mestu austanlands.

Á laugardaginn gengur svo í ákveðna suðaustanátt með vætusömu veðri sunnan- og vestanlands,“ segir á vef Veðurstofunnar.

Veðurhorfur á landinu næstu daga

Á föstudag: Suðvestlæg eða breytileg átt 3-8 m/s og úrkomulítið um morguninn. Rigning með köflum seinnipartinn, en yfirleitt þurrt austanlands. Hiti 7 til 12 stig yfir daginn.

Á laugardag: Vaxandi suðaustanátt og rigning sunnan- og vestanlands, 10-18 m/s síðdegis með talsverðri úrkomu. Hægari vindur á norðaustanverðu landinu og þurrt að kalla fram undir kvöld. Hiti 7 til 13 stig.

Á sunnudag: Suðlæg átt 5-13 og skúrir, en hvassari norðaustanátt og úrkomumeira á Vestfjörðum. Þurrt að kalla austanlands eftir hádegi. Hiti 8 til 14 stig.

Á mánudag og þriðjudag: Ákveðin norðaustanátt og rigning, talsverð úrkoma austanlands. Hiti 7 til 12 stig.

Á miðvikudag: Norðaustanátt og skúrir, en þurrt að kalla á Suður- og Vesturlandi. Kólnar í veðri.