Vindur með hægasta móti en víða súld eða rigning

Í hugleiðingum veðurfræðings segir að það dragi úr vætu eftir hádegi og muni dragið þokast til norðausturs. Hiti verður á bilinu átta til sextán stig og hlýjast á Austurlandi.

„Seinnipartinn í dag fer að nálgast lægð úr vestri og í kvöld má því búast við vaxandi sunnanátt á Suður- og Vesturlandi og það bætir í rigninguna þegar regnsvæði lægðarinnar nær landi.

Á morgun gera spár ráð fyrir að áðurnefnd lægð verði stödd skammt vestur af Breiðafirði og valdi suðvestan strekkingi eða allhvössum vindi. Með fylgir rigning eða skúrir, en norðaustan- og austanlands ætti að verða þurrt og bjart veður og þar verður jafnframt hlýjast, eða um 17 stiga hiti þar sem best lætur,“ segir í hugleiðingum veðurfræðings.

Veðurhorfur á landinu næstu daga

Á föstudag: Suðvestan 10-18 m/s og rigning eða skúrir, en bjartviðri norðaustan- og austanlands. Hiti 8 til 16 stig, hlýjast á Austurlandi.

Á laugardag: Snýst í norðan 5-13, en vestlægari sunnanlands. Súld eða rigning á norðanverðu landinu, skúrir sunnantil fram eftir degi, en bjartviðri á Austfjörðum. Hiti 6 til 13 stig, svalast fyrir norðan.

Á sunnudag: Austan og norðaustan 5-13 og rigning með köflum, en þurrt að kalla um landið norðan- og vestanvert. Hiti frá 4 stigum í innsveitum fyrir norðan, upp í 11 stig syðst.

Á mánudag: Hæg breytileg átt og léttskýjað, en stöku skúrir syðst á landinu. Hiti 5 til 10 stig, en kaldara að næturlagi.

Á þriðjudag: Suðaustanátt og dálítil rigning á Suður- og Vesturlandi, en léttskýjað fyrir norðan og austan. Hiti 6 til 12 stig.

Á miðvikudag: Austlæg átt og dálítil rigning sunnanlands, en þurrt í öðrum landshlutum. Hiti breytist lítið.