„Búnir að blása af Tenerife-ferðir“

„Þetta verður ótrúlega áhugavert og skemmtilegt verkefni,“ sagði Oliver í samtali við Val Pál Eiríksson, íþróttafréttamann Stöðvar 2 í beinni útsendingu eftir að ljóst varð hvaða liðum Breiðablik myndi mæta í B-riðli Sambandsdeildarinnar. 

Breiða­blik dróst í riðil með Gent, Maccabi Tel Aviv og Zorya Luhansk frá Úkraínu.

„Að fara meðal annars til Ísrael og Belgíu verður gaman. Svo sá ég að síðasti leikur úkraínska liðsins var spilaður í Póllandi þannig að það kemur þá bara væntanlega í ljós síðar hvar okkar leikur við þá verður spilaður. Þetta er bara frábært verkefni að taka þátt í og við ætlum að gera okkar besta.

Við erum ekki bara mættir í þessa keppni til að taka þátt, við ætlum að gera allt sem í okkar valdi stendur til að sækja stig í þessum riðli“

Um sögu­legan drátt var að ræða en í fyrsta skipti í sögunni var ís­lenskt lið í pottinum. Breiða­blik tryggði sér í gær, fyrst allra íslenskra karla­liða í fó­bolta, sæti í riðla­keppni í Evrópu­keppni eftir 2-0 sigur í ein­vígi sínu gegn Struga FC frá Norður-Makedóníu.

Dregið var í riðlana í Móna­kó en spennan var mikil á Kópa­vogs­velli þar sem leik­menn og þjálfarar Breiða­bliks voru saman­komnir til þess að fylgjast með þessari sögu­legu stund fyrir ís­lenska knatt­spyrnu.

En hver var tilfinningin hjá leikmönnum Blika fyrir drættinum? Langaði þeim að mæta stórum liðum, ferðast til einhverra ákveðinna landa eða mæta liðum sem eru góðir möguleikar á að sigra? 

„Ég myndi segja að það væri blanda af þessu öllu saman,“ svaraði Oliver. „Ég hefði til að mynda verið mjög til í að fara til Fiorentina og svo einnig mæta liðum sem við eigum raunverulegan möguleika á að ná í stig gegn. Við erum allavegna brattir fyrir þessum drætti en ábyggilega hefur það verið mismunandi hvaða liðum menn hefðu viljað mæta.“

Hann viðurkennir að þekkja ekki mikið til þeirra liða sem Blikar eru að fara mæta.

„Ég þekki þau ekki neitt, skoða bara á einhverjum síðum hvar þau spila og hvaða úrslit þau ná í.  Ég get ekki nefnt einn leikmann í þessum liðum en við vitum að þau lið sem eru komin þetta langt í keppninni eru öll gífurlega sterk.“

Verkefnið fram undan sé afar áhugavert. 

„Þetta verður ótrúlega skemmtilegt og lengir keppnistímabilið. Sumir af okkur eru búnir að blása af Tenerife-ferðir í október og fleira. Þetta er bara geðveikt og ótrúlega gaman að upplifa þetta með Breiðabliki.“