Hitinn gæti farið í 23 stig en regn­svæði nálgast

Þetta kemur fram á vef Veðurstofunnar. Þar segir að það sé nú hlýtt og hlýjast í dag verði væntanlega á norðaustanverðu landinu, þar sem hitinn gæti náð 23 stigum þar sem best lætur.

„Íbúar á vestanverðu landinu munu sjá bliku (háský) færast yfir úr vestri. Það er að nálgast regnsvæði og vestantil á landinu verður vaxandi sunnanátt síðdegis og búast má við rigningu þar í kvöld.

Á morgun eru síðan horfur á mjög þungbúnum og blautum degi á stórum hluta landsins, sem eru viðbrigði frá því þurra veðri sem verið hefur undanfarið. Norðaustan- og austanlands verður hlýtt áfram (ætti að ná yfir 20 stig) og þar hangir þurrt að mestu fram eftir degi, en búast má við rigningu einnig á þessum slóðum annað kvöld,“ segir í hugleiðingum veðurfræðings.

Veðurhorfur á landinu næstu daga

Á laugardag: Suðlæg átt 5-13 m/s, en hvassara í vindstrengjum á Vesturlandi fyrir hádegi. Víða talsverð rigning eða súld, en þurrt austanlands fram á síðdegið. Hiti 12 til 20 stig, hlýjast á Austurlandi.

Á sunnudag: Vestan og suðvestan 5-10. Skýjað með köflum og sums staðar dálitlir skúrir. Hiti 11 til 18 stig, hlýjast á Suðausturlandi.

Á mánudag: Breytileg átt 3-10 og rigning með köflum í flestum landshlutum. Hiti 10 til 15 stig.

Á þriðjudag: Hæg breytileg átt og birtir víða upp. Hiti 9 til 17 stig, hlýjast sunnanlands.

Á miðvikudag og fimmtudag: Suðlæg átt og smáskúrir, en bjartviðri um landið norðaustanvert. Hiti 10 til 17 stig, hlýjast norðaustanlands.