Ritar opið bréf til Vöndu: „Sem rýtingur í brjóst okkar stelpna“

Friðjón Árni ritar þetta opna bréf til Vöndu þar sem að hann segir hana of upptekna við önnur mál þessa dagana til þess að svara 4. flokks þjálfara út á landi, hvorki í síma né í gegnum tölvu­póst. 

Fjórði flokkur kvenna í fótbolta hjá KF/Dal­vík skráði eitt lið til leiks á Ís­lands­mótið í sumar. Liðið var skráð sem B-lið þar sem forráðamenn liðsins töldu getu­bilið vera mikið í liðinu og að sama skapi sé fjöldi leikmanna ekki mikill hjá fjórða flokki. 

„Einnig vildum að þær fengu verk­efni við hæfi. Liðið kom svo öllum á ó­vart og er búið að vera frá­bært í sumar og vann sinn riðill á Ís­lands­mótinu. Við fáum svo þau skila­boð að vegna þess að við erum ekki með lið í A-liða keppni fær liðið ekki að taka þátt í úr­slita­keppninni sem stelpurnar stefndu á í allt sumar.“

Í reglu­gerðum KSÍ er það skýrt að slíkt að B-lið geti ekki tekið þátt í úslitakeppni. 

„Mér finnst hins vegar sú regla og reglu­gerð barn síns tíma þar sem þarna er verið að úti­loka minni fé­lög frá því að eiga séns á glæstum árangri. Með þessu má ætla að það sé yfir­lýst stefna að stærri fé­lögin eigi ein að eiga mögu­leika á því að verða Ís­lands­meistarar. Er eðli­legt að einungis lið frá Breiða­blik, Stjörnunni/Álfta­nes, FH/ÍH, KA eða öðrum fjöl­mennum fé­lögum geti hampað Ís­lands­meistara­titlum? Og að fjöldi iðk­enda hafi þar úr­slita­á­hrif?“ 

„Sem rýtingur í brjóst okkar stelpna“

Friðjón Árni spyr hvort að KSÍ sé virki­lega endan­lega orðið að höfuð­borgar­sam­tökum. 

„Sem skeytir lítið um fé­lögin úti á landi sem eru að berjast í því að halda úti liðum í öllum flokkum af báðum kynjum og finnst eðli­legast að fé­lögin sem eru með flesta iðk­endur standi framar öðrum? Er það í anda KSÍ að fá­mennum liðum eins og KF/Dal­vík og fleirum sé gert það ó­mögu­legt að sigra og ná eftir­minni­legum árangri og upp­skera eftir erfiði vinnu sinnar?

Þessi stefna og reglu­gerð er sem rýtingur í brjóst okkar stelpna og gerir lítið úr þeirri metnaðar­fullu upp­byggingu sem á sér nú stað í kvenna­boltanum hér út með Eyja­firði. KSÍ þarf að gera betur svo fólk í minni byggðum á lands­byggðinni trúi því að allir eigi mögu­leika á því að sigra. Það er nógu erfitt að halda stelpum á þessum aldri inn í fót­bolta í þessum litlu sveitar­fé­lögum hvað þá þegar þær fá svona skell að öll vinnan og mark­miðum sé sópað út af borðinu út af úr­eltri reglu­gerð hjá KSÍ.“ 

Mölbrotin reglugerð

Hann veltir því fyrir sér til hvers KF/Dalvík sé þá yfir höfuð að taka þátt í Ís­lands­mótinu, ef liðið eigi síðan ekki mögu­leika á árangri? 

„Það gjald­fellir líka al­gjör­lega mótið ef lið sem endar í 4.-8. sæti í riðli, fær sæti í úr­slita­keppni bara af því að það er A-lið frá þeim í keppni. Að sama skapi get ég ekki í­myndað mér að það sé ein­hver vilji frá þeim fé­lögum til að taka þátt í svo­leiðis leik, að leika í úr­slita­keppni án þess að hafa náð árangri. Það er ekki í anda keppnis­í­þrótta.“

Í sömu reglu­gerð sé minnst á að Ís­lands­mótið eigi að vera svæðis­skipt og svo sé úr­slita­keppni á milli svæða.

„Þessi reglu­gerð er möl­brotin og al­ger­lega virt að vettugi,“ skrifar Friðjón. „Við höfum farið í sjö úti­leiki í fimm ferðum og keyrt um 900 km í hvert skipti. Við höfum þrisvar farið til Reykja­víkur, einu sinni á Reykja­nesið og í eitt skipti á Hvols­völl. Ég veit ekki hvernig KSÍ sér lands­hlutana en þessir lands­hlutar eru svo sannar­lega ekki á okkar svæði. Kostnaður við þessi ferða­lög er líka gríðar­legur og veltur í heildina á milljónum sem stelpurnar hafa unnið hörðum höndum að safna fyrir.“ 

Það sé mjög skrýtið að fara eftir einni reglu í reglu­gerðinni en hunsa svo aðra. 

„Bara eftir henti­semi KSÍ. Við hefðum jafn­vel skipu­lagt sumarið með allt öðrum hætti hefðum við vitað af þessari reglu og velt fyrir okkur hvort fjár­munum væri ekki verið betur varið við keppni nærri heima­högunum og á móti er­lendis eða eitt­hvað sam­bæri­legt.

Ég hafði sam­band við móta­stjóra KSÍ sem sagði mér að rökin fyrir þessari reglu væru aug­ljós. Ég er greini­lega ekki þannig þenkjandi því rökin eru alls ekki aug­ljós í mínum huga því ekki skrái ég lið með það að mark­miði að rústa mótinu. Það græðir enginn neitt á því, allra síst leik­menn sem ég þjálfa og kenni að bera virðingu fyrir sann­girni og heilindum innan vallar sem utan. Ég trúi því heldur ekki að móta­stjóri geti ekki metið hvert til­felli fyrir sig í stað þess að skýla sér á bak við reglu­verk. Þetta til­felli, sem er 4. fl. lið KF/Dal­víkur er vonandi þannig vaxið að hægt sé að meta okkur í hag.“

Ómögulegt að útskýra þetta fyrir stelpunum

Friðjón Árni segir leik­menn fjórða flokks KF/Dal­víkur þrá að fá já­kvætt svar við þessu bréfi.

„Sem og annað knatt­spyrnu­fólk úr fá­mennum fé­lögum sem heldur kannski enn að lið þeirra geti unnið titla séu liðin nógu góð. Er mögu­leiki að stelpurnar fái að taka þátt í úr­slita­keppni eins og þær eiga skilið og hafa unnið sér inn? Ef það er ekki mögu­legt velti ég því upp hvort KSÍ ætli að greiða ferða­kostnaðinn fyrir okkur þar sem KSÍ braut reglu­gerðina um svæða­skiptinguna vís­vitandi?

Ef stelpurnar fá að taka þátt í úr­slita­keppni og falla úr leik í fyrstu um­ferð er það hluti af leiknum, en að vera meinuð þátt­taka út af reglu­gerð er eitt­hvað sem er ó­mögu­legt að út­skýra fyrir þeim. Ég veit alla­vegana að þær eru niður­brotnar og von­sviknar nú þegar. Hver sem niður­staðan verður mun ég þjálfari liðsins og aðrir að­stand­endur gera allt sem í okkar valdi stendur að hvetja þær til dáða og gæta þess að fót­bolta­á­hugi þeirra og sjálfs­traust bíði ekki hnekki.“