Vikulegar veiðitölur úr laxveiðiánum

Það voru fimm laxveiðiár sem voru með meira en 100 laxa viku og þar er Ytri Rangá efst með 362 laxa veidda í vikunni og situr áinn í toppsæti listans með 1.721 lax en það er samt 600 löxum minni veiði en í fyrra.  Veiðin fór frekar seint af stað í henni sem lofar vonandi góðu fyrir seinni helminginn af tímabilinu. Eystri Rangá skilaði 256 löxum og er með heildarveiði upp á 1.426 laxa sem er um 500 löxum minna en í fyrra.

Hinar árnar sem voru með yfir 100 laxa viku voru Selá með 131 lax, Miðfjarðará með 111 laxa og Hofsá með 104 laxa. Árnar á vesturlandi eru flestar að eiga það mjög erfitt vegna vatnsleysis nema þá Haffjarðará en veiðin í henni síðustu vikuna var 81 lax og heildarveiðin í henni 723 laxar í sumar. Norðurá, Langá, Hítará, Gljúfurá og allar árnar meira og minna í dölunum þurfa nauðsynlega á góðri úrkomu að halda en því miður er hún ekki í kortunum næstu daga. Það er alveg ljóst að ofan í frekar slappar smálaxagöngur er þessi þurrkatíð sem nú hefur staðið yfir í næstum því sjö vikur að gera þetta tímabil að einu af þeim verstu í mörgum ánum. Ljósi punkturinn er batinn í ánum á norðausturlandi og eins í Laxá í Aðaldal en hún hefur verið töluvert betri en undanfarin sumur.