„Þetta er heimskuleg spurning“

Popp var spurð að því hvort að leikmenn kvennaliðs Þýskalands vonuðust ekki eftir því að allir í Þýskalandi færu núna að tala um þær vegna þess að karlaliðið væri í krísu.

„Þetta er heimskuleg spurning, í hreinskilni sagt. Við hugsum bara um okkur sjálfar. Ég myndi vilja að það væri talað um karlana OG konurnar. Það væri gaman að karlarnir kæmust aftur á beinu brautina. Heilt yfir viljum við verða aftur sama fótboltaafl í heiminum,“ sagði Popp.

Þýska kvennaliðið komst í úrslit EM í fyrra en tapaði þar fyrir Englandi í framlengdum leik. Vonir standa til þess að liðið nái einnig langt á HM í Eyjaálfu í sumar en þar er liðið í riðli með Marokkó, Kólumbíu og Suður-Kóreu og er fyrsti leikurinn 24. júlí.

Karlalið Þýskalands hefur hins vegar tapað þremur af síðustu fjórum leikjum sínum, og gert eitt jafntefli. Liðið tapaði gegn Belgíu í mars, gerði 3-3 jafntefli við Úkraínu nú í júní en tapaði svo gegn Póllandi 1-0 og gegn Kólumbíu 2-0. Allt voru þetta vináttulandsleikir því Þýskaland spilar ekki í undankeppni EM, því liðið verður gestgjafi mótsins á næsta ári.

Á HM karla í Katar í desember féll Þýskaland út í riðlakeppninni, eftir að hafa tapað gegn Japan í fyrsta leik.

Popp segir stefnuna setta á gull í Ástralíu á HM: „Mig langar til að taka titilinn. Við höfum gæðin í það.“