Gísli Þorgeir beit fast á jaxlinn og Magdeburg vann Meistaradeildina

Gísli Þorgeir fór úr axlarlið þegar Magdburg tryggði sér sæti í úrslitaleiknum með sigri gegn Barcelona í undanúrslitum í gær. Til þess að spila þennan leik var Gísli Þorgeir sprautaður í öxlina og mun hann svo fara í aðgerð vegna meiðsla sinna seinna í sumar. 

Jafnt var, 26-26, eftir venjulegan leiktíma og þar af leiðandi þurfti að framlengja leikinn. Nikola Portner varði tvö skot í síðustu sókn Kielce í lokasókn venjulegs leiktíma og Portner varði fyrsta skot framlengingarinnar. 

Gísli Þorgeir braut svo ísinn í framlengingunni og kom Magdeburg á bragðið. Gísli Þorgeir nældi svo í vítakast á lokaandartaki fyrri hluta framlengingarinnar og Kay Smits skilaði boltanum rétta leið. Staðan 28-27 fyrir Magdeburg í hálfleik í framlenginunni. 

Michael Damgaard jók svo muninn í 29-27 eftir klippingu með Gísla Þorgeiri sem kom svo Magdeburg í 30-28 rúmri mínútu fyrir leikslok með sjötta marki sínu í leiknum. Lokatölur í leiknum urðu svo 30-29 Magdeburg í vil. 

Smits var markahæsti leikmaður Magdeburg í leiknum með átta mörk en Alex Dujshebaev skoraði mest fyrir Kielce átta mörk sömuleiðs. 

Þetta er í fjórða skipti sem Magdeburg vinnur Meistaradeildina en liðið vann síðast árið 2002 en þá léku Ólafur Indriði Stefánsson og Sigfús Sigurðsson með liðinu og Alfreð Gíslason var við stjórnvölinn.