„Eins og við værum yfirspenntar“

„Ég er kannski sátt úr því sem komið var. Mér fannst við slakar í fyrri hálfleik, töpuðum boltanum oft, lélegar sendingar og vorum svolítið að gefa þeim færin. En við fórum vel yfir þetta í hálfleik og mér fannst við eiga seinni hálfleikinn, allavega síðasta hálftímann. Ætli þetta hafi ekki verið sanngjarnt á endanum,“ sagði Ásta við Vísi eftir leik.

Blikar svöruðu jöfnunarmarki Stjörnukvenna af krafti og jöfnuðu innan tíðar.

„Það er kannski aðeins of seint að rífa sig í gang þegar hitt liðið er búið að skora. Það er búið að gerast svolítið í sumar. En við svöruðum þessu vel og rifum okkur í gang. Það er svekkjandi að nýta ekki færin eins og vítið en það er eins og það er,“ sagði Ásta en Agla María Albertsdóttir skaut í stöng úr vítaspyrnu skömmu áður en Breiðablik jafnaði.

En hvað fannst Ástu vanta upp á hjá Blikum í fyrri hálfleik?

„Við vorum svolítið langt frá þeim og það var eins og við værum yfirspenntar. Það var mikið um lélegar móttökur og sendingar og við þurftum bara aðeins að slaka á og vera rólegar á boltanum,“ sagði Ásta.

Breiðablik er nú í 2. sæti Bestu deildarinnar með þrettán stig, þremur stigum á eftir toppliði Vals.

„Þetta er þrusugóð deild og allir eru að taka stig af öllum. Við byggjum bara ofan á þetta og gerum betur í næsta leik,“ sagði Ásta að lokum.