Foreldrar fegnir að leikskóli í Grindavík gleymdist

Í opinberum vinnudeilum ber deiluaðilum að boða verkföll með fimmtán daga fyrirvara. Í verkfallsboðun BSRB var ekki minnst á leikskóla Grindavíkurbæjar yfir þá starfsstaði þar sem boðað hefur verið til verkfallsins. Bæjarskrifstofa, sundlaug og áhaldahús Grindavíkurbæjar eru hins vegar þar á meðal. 

„Það voru mistök gerð í boðun og ekki minnst á leikskólann þrátt fyrir að kosið hafi verið um það, þannig starfsfólk á þessum leikskóla fara ekki í verkfall á morgun,“ segir Freyja Steingrímsdóttir, samskiptastjóri stéttarfélagsins.

Fríða Egilsdóttir leikskólastjóri Lautar segir foreldra fegna.

„Það eru viðbrögðin sem ég fékk þegar ég sendi póst á föstudaginn,“ segir hún. „Þetta voru bara mannleg mistök hjá BSRB. Þeim fannst þetta miður.“

Tveir leikskólar eru í Grindavík, annar einkarekinn og verður starfsemin þar því ekki fyrir áhrifum verkfalla.