Arnar tjáir sig: „Tímasetningin óskiljanleg“

Arnari var sagt upp á fimmtudaginn var eftir fyrsta landsliðsglugga Íslands í nýrri undankeppni EM. Þar tapaði liðið 3-0 fyrir Bosníu en vann svo Liechtenstein 7-0. Hann tók við liðinu í lok árs 2020 eftir að hafa áður þjálfað U21 árs landslið Íslands.

Extra Time er vikulegur þáttur þar sem umferðin í belgísku úrvalsdeildinni er gerð upp og hefur Arnar undanfarin ár verið reglulegur gestur. Hann var á meðal gesta í þættinum í gær, og tjáði sig opinberlega um uppsögnina. Hann segist ekki skilja tímasetningu uppsagnarinnar.

„Mér þykir tímasetning uppsagnarinnar vera óskiljanleg. Þetta er mjög súrt og óréttlátt. Sérstaklega eftir úrslitin. En ég er líka stoltur og er viss um að nú sé til staðar sterkur grunnur á Íslandi, að liðið muni spila góðan fótbolta,“ sagði Arnar Þór í þætti gærdagsins.

Arnar var þá spurður af þáttastjórnendum hvort væntingar sambandsins væru of miklar vegna árangursins sem náðist í aðdraganda ráðningar hans. En Ísland komst á EM 2016 og HM 2018 áður en Arnar tók við 2020.

Arnar sagði þá eðlilegt að kröfurnar væru miklar eftir slíkan árangur, en þyrfti að taka mið af stöðunni sem var uppi þegar hann tók við. Erfitt væri að gera sömu kröfur til hans.

Þar undirstrikaði Arnar jafnframt að hann hefði tekið við liðinu í erfiðri stöðu, þegar skandall skók sambandið og hann hafi ekki mátt velja ákveðna leikmenn um hríð.

Í þættinum leggur Arnar áherslu á að liðið hafi unnið sinn stærsta sigur í sögunni gegn Liechtenstein í aðdraganda uppsagnarinnar.

„Þremur dögum fyrir það töpuðum við 3-0 gegn Bosníu. Það var ekki góður leikur hjá okkur. Við spiluðum passíft og með handbremsuna á. En við komum vel til baka gegn Liechtenstein,“ sagði Arnar.

Arnar kveðst þá ætla að mæta áfram vikulega í Extra Time fyrst aðstæður hans breyttust. Framhaldið verði svo að koma í ljós.

„Ég hef sjaldan planað framtíð mína í lífinu, sérstaklega sem þjálfari. Við sjáum hvað framtíðin ber í skauti sér. Ég veit ekki enn hvort ég vilji fara aftur í þjálfun eða halda mig við sjónvarpsstörf í bili. Við sjáum til, ég hef tíma,“ sagði Arnar í þættinum.

Hér má sjá hluta þáttarins þar sem Arnar tjáir sig um málefni landsliðsins. Þátturinn er á flæmsku.

Fréttin hefur verið leiðrétt. Arnar sagði ekki orðrétt að kröfur sambandsins væru of háar, líkt og fyrst var greint frá, og haft eftir belgíska miðlinum Voetbal Nieuws, sem einnig hefur leiðrétt sömu villu í sínum fréttaflutningi. Umræður í þættinum almennt snertu á kröfum sambandsins, líkt og segir að ofan.