Fara af neyðar­stigi á hættu­stig

Þetta kemur fram í tilkynningu frá Almannavarnadeild ríkislögreglustjóra. Staðan er núna sú að búið er að rýma á annað hundrað heimila í Neskaupstað, Seyðisfirði og á Eskifirði og hafa um fimm hundruð manns þurft að yfirgefa heimilin sín.

„Nú þegar tökum hefur verið náð á ástandinu og enginn er talinn í bráðri hættu hefur eins og áður segir, verið ákveðið að fara af neyðarstigi á hættustig, sem er í samræmi við verklagsreglur þar um,“ segir í tilkynningunni.

Gert er ráð fyrir að rýmingin standi yfir til morguns á Seyðisfirði í Neskaupstað og á Eskifirði. Verður staðan þá tekin að nýju og kynnt. Þá verður það strax kynnt hlutaðeigandi ef breytingar verða gerðar á þessum svæðum.