Dálítil væta og hiti að níu stigum

Í hugleiðingum veðurfræðings segir að það verði dálítil væta á víð og dreif, en lengst af þurrt og bjart á Norðaustur- og Austurlandi.

Hiti verður á bilinu þrjú til níu stig að deginum og dregur seinnipartinn úr vindi.

„Hægur vindur víðast hvar á morgun, skýjað með köflum og yfirleitt þurrt, en síðdegis má búast við stöku skúrum sunnan- og vestantil á landinu. Heldur kólnandi veður,“ segir á vef Veðurstofunnar.

Veðurhorfur á landinu næstu daga

Á föstudag: Hæg breytileg átt. Skýjað með köflum og yfirleitt þurrt, en stöku skúrir sunnan- og vestantil síðdegis. Hiti 1 til 6 stig yfir daginn, en í kringum frostmark um landið norðaustanvert.

Á laugardag: Hæg vestlæg eða breytileg átt og stöku skúrir eða él, en yfirleitt þurrt um landið sunnanvert. Hiti 0 til 6 stig. Dálítil snjókoma norðaustantil um kvöldið.

Á sunnudag: Snýst í norðaustan 5-13 m/s með dálitlum éljum, en lengst af þurrt sunnan heiða. Kólnar í veðri.

Á mánudag: Norðaustlæg átt og lítilsháttar él, en bjartviðri á Suður- og Vesturlandi. Frost 1 til 9 stig.

Á þriðjudag og miðvikudag: Norðlæg átt og éljagangur, en yfirleitt þurrt um landið sunnanvert. Kalt í veðri.