Atkvæðagreiðsla um miðlunartillögu í algjöru uppnámi

Aðalsteinn Leifsson ríkissáttasemjari lagði fram miðlunartillögu í kjaradeilu Eflingar og Samtaka atvinnulífsins í gær með fyrirhugaðri atkvæðagreiðslu meðal allra félagsmanna stéttarfélagsins sem hefjast ætti á morgun laugardag og ljúka á þriðjudag. Til að atkvæðagreiðslan geti farið fram þarf ríkissáttasemjari að fá aðgang að félagaskrá eða kjörskrá Eflingar.

Sólveig Anna Jónsdóttir formaður félagsins skrifaði ríkissáttasemjara bréf í gær þar sem hún neitar að afhenda Advania fyrir hönd ríkissáttasemjara rafrænt afrit af kjörskránni. Ríkissáttasemjara skorti lagaheimild fyrir afhendingu kjörskrárinnar.

„Hér er bara einfaldlega of mörgum spurningum ósvarað. Ríkissáttasemjari hefur auðvitað augljóslega misst hlutleysi sitt. Það er náttúrlega það sem við stöndum frammi fyrir,“ segir Sólveig Anna. Honum beri að hafa samráð um framkvæmd atkvæðagreiðslu um miðlunartillögu og það hafi hann ekki gert.

Samkvæmt lögum eigi framkvæmd atkvæðagreiðslunnar að vera hjá félaginu og ríkissáttasemjari hafi enga heimild til að taka atkvæðagreiðsluna til sín og krefja Eflingu um afhendingu kjörskrár og afhenda Advania hana. Þá muni félagið heldur ekki sjá um atkvæðagreiðsluna fyrir ríkissáttasemjara.

„Við erum að gera okkar eigin kjarasamning eins og margoft hefur komið fram,“ segir formaður Eflingar

Þá væri kjörsókn góð í atkvæðagreiðslu félagsins um boðun verkfalls en henni ljúki ekki fyrr en á mánudagskvöld. Niðurstöðu hennar væri beðið og verkfallsundirbúningi haldið áfram. Verði verfall samþykkt verði farið í það. Ríkissáttasemjari beri ábyrgð á þeirri stöðu sem nú væri komin upp og félagið muni mögulega láta reyna á aðgerðir hans fyrir dómstólum

„Já, við getum gert það. Við erum eins og ég segi að vinna þetta mál áfram, hvað við gerum, hér innanhúss,“ sagði Sólveig Jónsdóttir.

Ríkissáttasemjari í kappi við tímann

Það eru aðeins klukkustundir þar til ríkissáttasemjari fyrirhugar að atkvæðagreiðsla um miðlunartillögu hans í deilu Eflingar og Samtaka atvinnulífsins hefjist á morgun. Hann segir vinnulöggjöfina veita honum mjög skýra heimild til að leggja fram miðlunartillögu þegar sáttaumleitanir hafi reynst árangurslausar.

„Vinnulöggjöfin er alveg skýr með það að þegar miðlunartillaga hefur verið lögð fram þá skal fara fram atkvæðagreiðsla um hana meðal allra þeirra sem starfa undir viðkomandi kjarasamningi,“ segir Aðalsteinn.

Til þess að atkvæðagreiðslan geti farið fram þurfi aðgang að kjörskrá sem væri í vörslu Eflingar.

„Með því að neita að afhenda hana stendur Efling í vegi fyrir að félagsfólk Eflingar geti greitt atkvæði um miðlunartillöguna. Þá hljótum við að skoða hvaða leiðir eru færar til að atkvæðagreiðslan geti farið fram.“

Það er auðvitað stuttur tími til stefnu, það stóð til að atkvæðagreiðslan hæfist á morgun ?

„Já það er alveg rétt. Ég vænti þess að Efling afhendi kjörskrána eins og ber að gera lögum samkvæmt. En þetta er nokkuð einkennileg staða sem er komin upp,“ segir Aðalsteinn.

Á fundi með Eflingu hafi verið gert grein fyrir því að kjörskrá yrði afhent Advania sem sæi um atkvæðagreiðsluna, rétt eins og flesta kjarasamninga sem gerðir hefðu verið í landinu og aðrar atkvæðagreiðslur á vegum verkalýðshreyfingarinnar. Ekki væri ástæða til að efast um öryggismál Advania varðandi persónuupplýsingar eins og Efling gæfi til kynna.

„Atkvæðagreiðslan getur ekki hafist án þess að við höfum kjörskrána. Það er alveg ljóst. Þá er sú staða að félagsfólk í Eflingu sem starfar á kjarasamningnum getur ekki greitt atkvæði um miðlunartillögu og við hljótum þá að skoða hvaða skref er eðlilegt að taka.

Er hægt að gera það með aðstoð lögreglu eða sýslumanns eða úrskurði hans eða eitthvað slíkt?

„ Í fyrsta lagi vænti ég þess að Efling afhendi kjörskrána eins og ber aðgera lögum samkvæmt. Viðtökum þetta eitt skref í einu og af yfirvegun,“ segir Aðalsteinn Leifsson