Léttir til um há­degi og vaxandi norð­austan­átt í nótt

Í hugleiðingum veðurfræðings á vef Veðurstofunnar segir að það verði stöku skúrir sunnan- og vestanlands en þurrt að kalla fyrir norðan. Léttir svo til vestantil um hádegi og að það kólni hægt þar sem hiti verður á bilinu núll til fimm stig síðdegis.

„Vaxandi norðaustanátt í nótt, 10-18 m/s en 18-23 á suðaustanverðu landinu. Má búast við snörpum vindhviðum við fjöll, einkum frá Eyjafjöllum til Hafnar í Hornafirði sem geta verið varhugaverðar fyrir vegfarendur, sérstaklega ökutæki sem taka á sig mikinn vind. Dálítil él norðan- og austanlands, en bjartviðri suðvestantil. Dregur hægt úr vindi annað kvöld. Hiti um eða yfir frostmarki.

Norðaustan 8-15 á fimmtudag og rigning, einkum austanlands, en úrkomulítið á Vesturlandi. Hlýnandi veður, hiti 2 til 7 stig seinnipartinn.“

Veðurhorfur á landinu næstu daga

Á miðvikudag: Norðaustan 10-18 m/s, en 18-23 í vindstrengjum á suðaustanverðu landinu. Dálítil él norðan- og austanlands og væta syðst, en bjartviðri suðvestantil. Hiti um eða yfir frostmarki.

Á fimmtudag: Norðaustan 8-15 með rigningu, einkum austanlands, en úrkomulítið á Vesturlandi. Hiti 2 til 7 stig.

Á föstudag: Austan og norðaustan 5-13 en 13-18 norðvestantil. Rigning norðan- og austanlands, en bjart með köflum á Suður- og Vesturlandi. Hiti breytist lítið.

Á laugardag: Austlæg eða breytileg átt, víða rigning með köflum en úrkomuminna norðaustantil. Hiti 2 til 7 stig.

Á sunnudag: Norðaustlæg átt og lítilsháttar væta í flestum landshlutum. Hiti breytist lítið.

Á mánudag: Útlit fyrir norðlæga átt, skýjað að mestu og sums staðar dálítil væta. Kólnar aðeins í veðri.