Fær ekki að spila með landsliðinu meðan hann leikur í Rússlandi

Normann var samningsbundinn Rostov í Rússlandi en var á láni hjá Norwich City á Englandi á síðustu leiktíð. Hann tók nýverið ákvörðun um að fara á láni til Dynamo Moskvu í Rússlandi en hann var orðaður við önnur félög í sumar, þar á meðal Leicester City á Englandi.

Ákvörðun hans að spila í rússnesku deildinni mun hafa áhrif á landsliðsferil hans en norskir fjölmiðlar greindu frá því í gær að stjórn norska knattspyrnusambandsins hafi komist að samkomulagi við landsliðsþjálfarann Ståle Solbakken um að útiloka Normann frá vali í landsliðið á meðan hann hefur sitt lífsviðurværi í Rússlandi.

Þetta er til að sýna samstöðu með öðrum Evrópuríkjum gegn innrás Rússa í Úkraínu.

„Almennt er það ekki hlutverk knattspyrnusambandsins að skipta sér af því hvaða félög leikmenn okkar spila fyrir en aðstæðurnar eru mjög sérstakar. Norsk og evrópsk knattspyrnusambönd eru samtaka um að setja þrýsting á Rússa vegna hernaðar þeirra,“ hafa norskir fjölmiðlar eftir Lisu Klaveness, forseta norska knattspyrnusambandsins.

Normann er 26 ára og hefur leikið tólf landsleiki frá 2019.