Hollendingar fundu nýjan þjálfara fyrir leikinn gegn Íslandi

Jonker tekur við liðinu af Mark Parsons sem var rekinn eftir slæmt gengi Hollands á EM í Englandi í sumar.

Fyrsta verkefni Jonker verður vináttuleikur gegn Skotlandi 2. september en svo tekur við leikurinn mikilvægi milli Hollands og Íslands þann 6. september, þar sem sigurvegarinn fer langleiðina að tryggja sér sæti á HM í Ástralíu og Nýja-Sjálandi á næsta ári.

„Við höfum háleit markmið ásamt gífurlegum gæðum og hæfileikum sem við munum byggja á fyrir HM 2023. Það er frábært að fá tækifæri að leiða liðið í gegnum þetta verkefni,“ sagði Jonker eftir ráðninguna. 

Jonker stýrði síðast Telstar í Hollandi en hann hefur meðal annars starfað hjá Wolfsburg, Barcelona og Bayern München á 34 ára löngum þjálfaraferli sínum.