Grealish bað dómarann um að sleppa því að reka Aurier út af

England vann öruggan sigur á Fílabeinsströndinni, 3-0, í leiknum á Wembley í gær. Ollie Watkins kom Englendingum yfir á 30. mínútu. Tíu mínútum síðar syrti enn í álinn hjá Fílbeinsstrendingum þegar Serge Aurier fékk sitt annað gula spjald og þar með rautt.

Grealish var samt allt annað en sáttur með þessa ákvörðun belgíska dómarans Eriks Lambrechts og bað hann um að þyrma Aurier.

„Ég vildi halda honum inni á því þetta er vináttulandsleikur og þú færð meira út úr því að spila gegn ellefu leikmönnum,“ sagði Grealish eftir leik. „Ég held að það hefði verið meiri áskorun fyrir okkur. Ég sagði við dómarann: í alvöru!“

Fimm mínútum eftir brottvísun Auriers kom Raheem Sterling Englandi í 2-0. Tyrone Mings skoraði svo þriðja mark enska liðsins í uppbótartíma.

Grealish lék fyrstu 62 mínútur leiksins og var á meðal bestu manna vallarins.