Veiran varð nær 30-falt útbreiddari hjá börnum

Allt er óbreytt í tvær vikur: 50 mega koma saman, 500 með hraðprófum og veitingastaðir og öldurhús loka klukkan ellefu á kvöldin. Fylgst er náið með öllum nýjustu upplýsingum um omíkron-afbrigðið og verið er að undirbúa hágæslurými.

Fréttastofa fjallaði um faraldurinn á meðal barna í kvöldfréttum Stöðvar 2:

„Um leið og við höfum fast land undir fótum með vísindum og gögnum til að slaka á þá gerum við það,“ sagði Willum Þór Þórsson heilbrigðisráðherra í samtali við fréttastofu í dag.

Hlutverk barna er breytt

Á þessari stundu er það þannig að óbólusett börn bera í miklum mæli smit sín á milli inni í skólunum og fara svo inn á heimili sín.

„Nú þegar stór hluti samfélagsins hefur ýmist verið bólusettur eða fengið smit er stærsti hópurinn sem er móttækilegur fyrir smitinu óbólusett börn. Þannig að hlutverk þeirra hefur mögulega breyst örlítið í faraldrinum,“ segir Valtýr Stefánsson Thors barnasmitsjúkdómalæknir í samtali við fréttastofu.

Um þessar mundir eru óbólusett börn að bera smit sín á milli inni í skólunum og fara svo inn á heimili sín. 

Í ljósi þessa væri bólusetningarherferð á meðal barna ekki aðeins til að vernda þeirra heilsu, heldur einnig raunar lýðheilsuaðgerð. Talið er að það myndi slá verulega á útbreiðslu faraldursins hjá öllum að draga úr tilfellum hjá börnum.

„Ef sú ákvörðun yrði tekin af sóttvarnaryfirvöldum að bólusetja þennan aldurshóp, og það eru mörg rök sem mæla með því, myndi það hafa talsverð áhrif á nýgengi í þessum aldurshópi. Það myndi forða stórum hópi barna frá því að lenda í sóttkví, einangrun og lokun skóla og frístundastarfs,“ segir Valtýr.

Sóttvarnalæknir er enn að meta hvort ráðist verði í bólusetningu hjá þessum hópi, en Lyfjastofnun Evrópu hefur gefið grænt ljós. Heilsugæslan hefur þá þegar hafið undirbúning. Málin ættu að skýrast í þessum mánuði.

Sérréttindi fyrir bólusetta

Sóttvarnalæknir segir í minnisblaði sínu að ef omíkron-afbrigðið reynist ekki valda skæðum sjúkdómi og bóluefnin halda áfram að virka, séu komnar faglegar forsendur til að ræða sérréttindi til handa þeim sem fengið hafa örvunarskammt.

Þórólfur nefnir dæmi: Fullörvaðir einstaklingar gætu losnað við sýnatöku fyrir viðburði, þeir gætu fengið undanþágu frá fjöldatakmörkunum, þeir gætu fengið þægilegri sóttkvíarreglur.

Aðrar undanþágur koma þá einnig til greina eins og að veita tvíbólusettum börnum yngri en 16 sérréttindi og fullbólusettum börnum ákveðnar undanþágur frá sóttkví.