Ástand á geðdeild og hertra aðgerða krafist strax

Þetta kemur fram í tilkynningu frá farsóttarnefnd Landspítalans en spítalinn er sem kunnugt er á hættustigi. Nefndin segir nauðsynlegt að herða takmarkanir í samfélaginu strax.

Metfjöldi greindist smitaður hér á landi í gær eða 200 manns.

„Álag á COVID göngudeild og rakningateymi spítalans er orðið gríðarlegt. Farsóttanefnd hefur miklar áhyggjur af stöðunni og álítur að herða þurfi takmarkanir í samfélaginu strax, ef takast eigi að ná utan um þessa bylgju. Þegar smit er jafn útbreitt og raun ber vitni um eru margfaldar líkur á að fá smit inn í starfsemi Landspítala með starfsmönnum, sjúklingum og gestum. Því er nauðsynlegt að takmarka umferð um spítalann eins og hægt er með því að leysa mál í gegnum síma og fjarfundi þar sem því verður við komið,“ segir í tilkynningu nefndarinnar.

Fjörutíu í sérstöku eftirliti

Í morgun klukkan níu lágu 16 sjúklingar með COVID á Landspítala. 11 eru á smitsjúkdómadeild, þrír á gjörgæslu í öndunarvél og tveir eru á geðdeild þar tveir sjúklingar eru nú með veiruna.

Í eftirliti COVID göngudeildar eru nú 1.508 manns sem er mesti fjöldi frá upphafi. Í eftirlitinu felst að fylgst er með fólkinu símleiðis en stór hluti fólks er einkennalaus. Af þessum 1508 eru 350 börn. Ríflega 40 manns eru í sérstöku eftirliti göngudeildar.

Nefndin sendir skýr skilaboð til starfsmanna spítalans.

„Starfsmenn skulu skipuleggja alla fundi sem mögulegt er sem fjarfundi. Eingöngu skal hafa staðfundi þegar nauðsyn krefur. Áhersla hefur verið á að halda verklegri kennslu óbreyttri og er því beint til skipuleggjenda fræðslu og kennslu að hafa fjarfundi þar sem því verður við komið, a.m.k. fyrir hluta hópsins, auk þess að virða grímuskyldu og fjarlægðamörk.“

Eins metra regla á spítalanum

Þá er minnt á að skima þurfi alla sjúklinga sem leggist inn í gegnum bráðamóttökur. Sé það ekki gert á bráðamóttöku þá þurfi viðkomandi legudeild að gera það sem fyrst eftir innlögn.

„Vegna anna við úthringingar, rakningar og tengd verkefni eru yfirmenn þeirra sem manna þessa pósta beðnir um að taka öll önnur verkefni af þessum lykilstarfsmönnum svo þeir geti einbeitt sér að þessu brýna og umfangsmikla verkefni sem baráttan við COVID er. Matsalir og kaffistofur eru sérstakt áhyggjuefni núna. Almennt er í gildi á Landspítala eins metra regla NEMA þegar gríma er tekin niður til að matast en þá gildir tveggja metra regla án undantekninga.“

Í fyrradag kom upp smit hjá inniliggjandi sjúklingi í geðþjónustu og hefur verið skimað vítt í kringum viðkomandi. Í gær greindist annar sjúklingur á sömu deild og alls fimm starfsmenn. Í dag eru áframhaldandi skimanir og rakning. Ein geðdeild er því lokuð fyrir innlagnir og önnur er í sóttkví að hluta.

„Farsóttanefnd vill eindregið ráðleggja þeim sem eru að ráðgera samkomur samstarfsmanna á aðventu eða í öðru samhengi að bíða með það á meðan við erum að fara í gegnum erfiðasta hjallann í þessari gríðarstóru smitbylgju. Það hefur sýnt sig að þrátt fyrir að fólk vandi sig og taki hraðpróf getur samt orðið mikil smitdreifing á slíkum skemmtunum.“

Þórólfur Guðnason sóttvarnalæknir hefur sagt að minnisblað með tillögum að hertum aðgerðum sé í vinnslu. Þá hefur Svandís Svavarsdóttir heilbrigðisráðherra sagt að herða þurfi aðgerðir innanlands. Ríkisstjórnin fundar klukkan 9:30 í fyrramálið.