Smitaðist beint eftir hjarta­að­gerð og kveðst eiga líf sitt bólu­efnum að þakka

Fimm sjúklingar og tveir starfsmenn greindust með Covid-19 í hópsýkingu sem kom upp á hjartadeild Landspítalans í síðustu viku. Enginn þeirra hefur veikst lífshættulega samkvæmt nýjustu upplýsingum. 

Einn þessara sjúklinga er Arnar Gunnar Hjálmtýsson, sem var nýbúinn í hjáveituaðgerð sem er flókin aðgerð. Fréttastofa tók hann tali þar sem hann dvelur á farsóttarhúsi í miðbæ Reykjavíkur. Af öllum stöðum segist Arnar síst hafa átt von á að smitast inni á sjúkrahúsi eftir að hafa gætt sín í gegnum faraldurinn.

Þegar Arnar smitaðist lá hann og jafnaði sig í tveggja manna herbergi á hjartaskurðdeild.

„Mér skilst að það hafi verið dóttir mannsins sem lá við hliðina á mér sem smitaði hann. Hann smitaði mig svo og ég er síðan þarna kannski í tvo daga veikur inni á deildinni án þess að nokkur viti af því. Ég fer náttúrulega á klósett og fram að fá mér vatn og annað slíkt sko,“ segir Arnar.

Gestakomur voru leyfðar á hjartaskurðdeildinni en voru sagðar takmarkast við ákveðinn fjölda.

„Eftir á að hyggja, og það er auðvitað alltaf gott að vera gáfaður eftir á, en það hefði átt að sleppa gestum inn á þessa deild. Það hefði verið óþarfi að við hefðum allir smitast, það er kannski svona aðalmálið í þessu,“ segir Arnar.

Eftir að sjúklingarnir greindust með Covid voru þeir fluttir á deild A7 á Borgarspítala, þar sem Arnar segir farir sínar ekki alveg sléttar af samskiptum við starfsfólk.

„Það er enginn sem tekur á móti okkur og við erum þarna eins og illa gerðir hlutir, allir nýkomnir úr stórum hjartaaðgerðum. Enginn af okkur ætlaði að smitast af Covid þarna inni, maður hefur verið hérna allan tímann á meðan covid er að reyna að koma í veg fyrir að maður smitist, og svo þegar maður er kominn þarna inn, þá smitast maður,“ segir Arnar.

Fólk þarf ekki að kvíða veirunni

Arnar er heilsuhraustur að eðlisfari og stóð aðgerðina vel af sér. Hann hefur nú verið í einangrun í rúma viku.

„Ég náttúrulega fór í sprautur og það hefur kannski bjargað lífi mínu, ég vil meina það. Ég hef ekki fundið fyrir Covid, ekki fengið hita eða neitt sko. Ég mæli bara með því fyrir alla sem eru að spá í það að það borgar sig að fara í sprautur. 

Aftur á móti vil ég líka meina að fenginni reynslu að fólk þarf ekki að óttast Covid í dag, ég í þessari stöðu, þeir sem eru búnir að fara í sprautur og fara eftir því sem landlæknir og sóttvarnalæknir hefur verið að gera þurfa ekki að kvíða neinu varðandi Covid,“ segir Arnar, sem fékk tvær sprautur af Pfizer fyrr á árinu.

Arnar er farið að lengja eftir upplýsingum um útskrift sína. Hann kveðst hafa átt mjög óánægjuleg samskipti við ákveðna starfsmenn sjúkrahússins en þakkar heilbrigðisstarfsfólki þó á heildina litið fyrir það sem gert hefur verið fyrir hann.

„Ég er nú búinn að sýna gríðarlega mikla þolinmæði. Ég átti að vera kominn heim fyrir 10 dögum síðan og það er ekki haft eitt orð samband við mig, ekki eitt orð. Ég ætlaði bara að fá að vita hvernig útskrift færi fram og eitthvað svoleiðis,“ segir Arnar, en nýlega var tilkynnt um að einangrun gæti héðan af staðið í aðeins sjö daga hjá þeim sem ekki sýndu einkenni.