Evrópuþingið hvetur diplómata til að sniðganga vetrarólympíuleikana í Pekíng

Ályktunin er ekki bindandi en í henni eru aðildarríki Evrópusambandsins hvött til að grípa til frekari refsiaðgerða, til að veita blaðamönnum frá Hong Kong dvalarleyfi og styðja aðra íbúa Hong Kong til að flytjast til Evrópu.

Tillagan naut stuðnings allra stærstu flokkanna á þinginu og samþykkt með 578 atkvæðum gegn 29. Sjötíu og þrír sátu hjá.

Í ályktuninni eru öll stjórnvöld og diplómatar hvött til að hafna boðum á vetrarólympíuleikana 2022 nema stjórnvöld í Kína sýni fram á bætt ástand mannréttindamála í Hong Kong, í Xinjiang, Tíbet, Mongólíu og víðar.

Stjórnvöld í Pekíng hafa hafnað öllum ásökunum um mannréttindabrot og sakað önnur ríki um afskipti af innanríkismálum landsins undir fölsku yfirskini.

Ályktunin hefur verið harðlega gagnrýndi af kínverska ríkismiðlinum Global Times, þar sem segir að um sé að ræða samansafn vestrænna öfgahugmyndafræða. And-kínversk öfl freisti þess að hrópa sem hæst og hafa sem mest áhrif en kínversk stjórnvöld muni ekki grafa undan kínverskum hagsmunum til að tryggja evrópskan stuðning við leikana.