Braust inn á heimili fyrrverandi sambýliskonu og réðst á kærastann hennar

Ákæran á hendur manninum er birt í Lögbirtingablaðinu sem bendir til þess að ekki hafi tekist að birta honum ákæruna með hefðbundnum hætti. Þingfesting í málinu er fyrirhuguð í Héraðsdómi Norðurlands eystra þann 12. ágúst. Mæti hann ekki þá lítur dómurinn svo á að hann viðurkenni hin fjölmörgu brot sem hann er sakaður um.

Tekinn þrisvar á tuttugu mínútum

Það var 16. mars í fyrra sem karlmaðurinn, sem skráður er til heimilis í gamla vesturbæ Reykjavíkur, mældist í þrígang á of miklum hraða. Fyrst við Árvelli á Kjalarnesi á 125 km hraða þar sem hámarkið er 90 km. 

Nokkrum mínútum síðar ók hann á 88 km hraða í Hvalfjarðargöngum hvar hámarkshraði er 70 km. Loks við Fiskilæk á Vesturlandsvegi á 120 km hraða eða 30 km hraða yfir hámarkinu. Aksturstíminn frá Árvöllum, í gegnum göngin og að Fiskilæk, er líkega um 20 mínútur á löglegum hraða.

Karlmaðurinn virðist hafa verið á leiðinni til Húsavíkur þar sem fyrrverandi sambýliskona hans og kærasti búa. Hann er ákærður fyrir að hafa ráðist á kærasta fyrrverandi sambýliskonu sinnar. Slegið einu sinni á hnakkann og tvisvar á hægra gagnauga.

Í framhaldinu er hann sakaður um að hafa komið óboðinn á heimili sinnar fyrrverandi, neitað að yfirgefa heimilið og veist að henni. Greip hann fast í vinstri handlegg hennar og tók hálstaki.

327 smáskilaboð á tveimur vikum

Í framhaldinu var karlmaðurinn úrskurðaður í nálgunarbann gagnvart konunni en þann 23. og 28. mars braut hann nálgunarbann eða gerði tilraun til þess, samkvæmt því sem fram kemur í ákæru, með því að koma á heimili konunnar.

Hann hringdi hann 108 sinnum, sendi 327 smáskilaboð og 27 myndskilaboð í síma konunnar á tveggja vikna tímabili þrátt fyrir að hafa verið gert að sæta nálgunarbanni.

Þann 4. apríl 2020 er hann svo sakaður um að hafa brotið upp opnanlegt fag í kjallaraglugga og farið í heimildarleysi inn á heimili konunnar þrátt fyrir að sæta nálgunarbanni. Réðst hann á kærasta hennar þar sem þau lágu saman í rúminu og sló ítrekað hnefahöggi í andlit, höfuð og ofanverðan líkama.

Þegar kærastinn reyndi að komast undan réðst karlmaðurinn á hann, sló í bakið, á aftanverðan háls og höfuð og sparkaði í vinstri upphandlegg. Afleiðingarnar voru þær að kærastinn hlaut skurð fyrir ofan hægri augabrún, sár á höfði, skurð við vinstra eyra, mar og bólgu milli hryggjar og hægra herðablaðs og sár á fingrum vinstri handar.

Fara fram á bætur

Aðeins fjórum dögum síðar mun ákærði hafa sett sig í samband við kærastann í gegnum þriðja aðila, gegn vilja hans og þrátt fyrir að hafa verið gert að sæta nálgunarbanni. Í skilaboðunum frá þriðja aðila kom fram að kærastinn skyldi passa sig og hótaði honum ef hann hætti ekki að hitta konuna.

Karlmaðurinn var að lokum tekinn undir áhrifum ávana- og fíkniefna akandi suður Borgarbraut í Borgarnesi.

Parið á Húsavík fer hvort um sig fram á bætur úr hendi hins ákærða. Kærastinn krefst tveggja milljóna króna en sambýliskonan fyrrverandi 1,2 milljóna króna.