Haraldur hissa á við­brögðum Sjálf­stæðis­kvenna

„Þessi viðbrögð komu mér alveg í opna skjöldu vegna þess að þetta hefur legið fyrir frá því í febrúar, þá sagði ég frá þessu í viðtali við Skessuhorn að ég liti þannig á að ef ég yrði felldur sem oddviti þá væri það dómur kjósendanna. Ég væri ekkert að finna neitt að því heldur að gefa nýjum oddvita sviðið,“ segir Haraldur í samtali við fréttastofu.

Margar Sjálfstæðiskonur lýstu yfir óánægju með yfirlýsingu Haraldar í gær. Viðbrögðin voru hörð og sögðu margar samflokkskonur hans yfirlýsingarnar vera „frekju og fýlustjórnun“, „aula-múv“ eða hótanir við samflokksmenn og kjósendur.

Brynjar Níelsson, þingmaður Sjálfstæðisflokksins, gagnrýnir „ofsafengin viðbrögð nokkurra flokksystkina“ sinna í Facebook-færslu sem hann birti í morgun. Hann segir freka karlinn í þessari sögu ekki vera Harald.

„Þetta hefur legið fyrir í marga mánuði og verið á flestra vitsorði. Þessi upphlaup núna eru augljóslega til þess að hafa áhrif á niðurstöðu prófkjörsins. Freki kallinn í þessari sögu er ekki Haraldur Benediktsson. Hann gerði ekkert annað en að segja satt aðspurður. Það er allur glæpurinn,“ skrifar Brynjar.

„Hef aldrei reynt að hefta framgang Þórdísar“

Rósa Guðmundsdóttir, formaður bæjarráðs Grundarfjarðar og bæjarfulltrúi Sjálfstæðisflokksins, rifjaði það upp í gær að Haraldur hafi beitt sömu taktík í prófkjöri flokksins í kjördæminu árið 2013. Þá sóttust hann og Eyrún Ingibjörg Sigþórsdóttir, þáverandi sveitarstjóri á Tálknafirði og varaþingmaður, eftir öðru sæti á lista flokksins. Haraldur lýsti því þá yfir á kjördæmisþingi að annað hvort tæki hann annað sætið eða ekki þátt í framboðinu.

„Það er bara eðlilegt þegar leiðtogi er felldur þá tekur nýr leiðtogi við. Þessu hef ég svarað á fjölmörgum framboðsfundum og samtölum í þessari baráttu og þá kemur mér fullkomlega á óvart að í því felist einhver hótun. Það væri annað ef ég hefði ekki sagt þetta í upphafi baráttunnar, að þá væri ég eitthvað að reyna að berjast um núna. En Guð forði mér frá því að ég sé að reyna að stilla mínum góða vini Þórdísi Kolbrúnu upp með einhverjum hætti,“ segir Haraldur.

Hann vísar ásökunum um að hann standi í hótunum og geti ekki keppst við konu án hótana á bug.

„Hefði ég lýst sérstökum stuðningi við að Þórdís yrði ráðherra í ráðherravali 2016 ef ég væri á einhvern hátt að reyna að hefta framgang kvenna? Ég fékk þá spurningu árið 2012 þegar var verið að velja á lista, ég svaraði bara því samkvæmt því sem ég hafði áform um,“ segir Haraldur.

„Mér finnst betra að koma hreint fram en að vera í einhverjum getgátum. Ég hef bara aldrei, og ég held ég hafi ágæta sögu í því, á nokkurn hátt reynt að hefta framgang Þórdísar eða verið að þvælast fyrir honum. Ég met hana mjög mikils.“