Krabba­meins­fé­lagið hyggst gefa Land­spítala allt að 450 milljónir

Þessi tillaga var samþykkt á aðalfundi Krabbameinsfélagsins í dag. Segir í tillögunni að göngudeildin sé staðsett í elsta hluta Landspítalans, í húsnæði sem henti illa fyrir starfsemina og deildin hafi fyrir löngu sprengt utan af sér.

„Þetta er dagdeild þar sem flestir sjúklingar fá sína lyfjameðferð í dag. Þessi deild er í dag alls ekki nógu góð, hún er allt of lítil og það vantar mikið upp á að hún sé nægilega góð,“ segir Halla Þorvaldsdóttir, framkvæmdastjóri Krabbameinsfélags Íslands, í samtali við Vísi.

Hún segir markmið félagsins að geta lagt til þessa peninga ef hægt sé að finna ásættanlega lausn fyrir framtíðina og sé það Landspítalans að útfæra slíka lausn.

„Landspítalinn á hugmynd að lausn sem er hægt að framkvæma nokkuð hratt og Krabbameinsfélagið er tilbúið til að styðja það verkefni til þess að tryggja almennilega aðstöðu fyrir þá sem þurfa að fá lyfjameðferð, fyrir aðstandendur þeirra líka og starfsfólkið sjálft,“ segir Halla.

Kallar eftir svörum frá stjórnvöldum

Halla segir að Krabbameinsfélagið hafi lengi haft miklar áhyggjur af aðstöðu göngudeildarinnar. Hún sé löngu orðin of lítil og rúmi ekki þá starfsemi lengur sem þar fer fram.

„Það er alveg ljóst að ef að við ætlum að halda þeim góða árangri sem við höfum varðandi meðferð krabbameina og ná enn betri árangri, sem hlýtur að vera markmiðið, þá verður aðstaðan að vera fyrsta flokks. Hún verður að vera það gagnvart sjúklingunum og gagnvart starfsfólkinu,“ segir Halla.

„Félagið hefur haft mjög miklar áhyggjur af þessari aðstöðu í mjög langan tíma. Hún er allt of lítil, það eru allt of mikil þrengsli, starfsfólkið getur ekki sinnt nægilega vel sinni teymisvinnu og svo framvegis. Til þess að það verði hámarksárangur af öllu sem er verið að gera verður þessi þáttur að vera í lagi.“

Hún segir Krabbameinsfélagið, sem hagsmunasamtök fólks með krabbamein, í góðri aðstöðu til að styrkja Landspítalans í þessu verkefni og nú sé ekki eftir neinu að bíða.

„Nú þarf skýr svör frá stjórnvöldum. Vandinn er mjög brýnn og hann mun aukast gríðarlega á næstu árum því krabbameinstilvikum mun fjölga um 30 prósent á næstu 15 árum. Það er sífellt betri árangur og fólk lifir lengur en það þýðir líka að það þarf meðferð lengur en ella þannig að álag mun aukast mjög mikið mjög hratt,“ segir Halla.

„Þannig að það er mjög brýnt að bregðast við, leysa málið sem allra fyrst. Okkur skilst að það sé hægt með þessari hugmynd Landspítala og félagið er tilbúið til að leggja sitt af mörkum svo að svo megi verða. En það er háð þessum skilyrðum að stjórnvöld verða að sýna að þeim er full alvara með málið. Við vonum að þau leggist á árar með okkur og Landspítalanum um það.“