Betri byrjun Víkinga í ár en í tveimur síðustu Íslandsmeistaratitlum félagsins

Óskar Ófeigur Jónsson skrifar 17. maí 2021 10:30

Kári Árnason og félagar í Víkingsliðinu eru að byrja Pepsi Max deildina frábærlega í sumar. Vísir/Hulda Margrét

Víkingar hafa unnið þrjá af fyrstu fjórum leikjum sínum en það gerðist síðast hjá félaginu fyrir þrjátíu árum síðan.

Lærisveinar Arnars Gunnlaugssonar unnu 3-0 sigur á meistarefnum Blika í Víkinni í gærkvöldi og höfðu einnig unnið Keflavík og Stjörnuna í fyrstu umferðunum auk jafnteflis á móti Skagamönnum þar sem Víkingsliðið fékk á sig jöfnunarmark á lokamínútu leiksins.

Víkingar sitja í toppsæti Pepsi Max deildar karla með 10 stig en FH, KA og Valur spila öll í kvöld og geta náð þeim að stigum.

Sögubækurnar sýna að svona byrjun er allt annað en daglegt brauð í Fossvoginum.

Síðustu Íslandsmeistaratitlar Víkinga voru sumurin 1991 og 1982. Á þessum tímabilum byrjuðu Víkingar þó ekki eins vel og þeir hafa gert í ár.

Byrjun Víkinga á Íslandsmeistarasumrinu 1991:

4-2 sigur á FH (20. maí)
0-1 tap á móti Val (30. maí)
1-4 tap á móti KR (9. júní)
3-1 sigur á ÍBV (12. júní)
[6 stig og 8-8 í markatölu]

Byrjun Víkinga á Íslandsmeistarasumrinu 1982:

1-1 jafntefli við Fram (16. maí)
1-0 sigur á Keflavík (19. maí)
2-3 tap fyrir ÍBÍ (23. maí)
2-2 jafntefli við ÍBV (29. maí)
[4 stig og 6-6 í markatölu]

Byrjun Víkinga á Íslandsmeistarasumrinu 1981:

2-1 sigur á FH (14. maí)
0-0 jafntefli við Fram (20. maí)
3-2 sigur á Val (31. maí)
3-0 sigur á Þór Ak. (5. júní)
[7 stig og 8-3 í markatölu]

Víkingar unnu „bara“ tvo af fyrstu fjórum leikjum sínum 1991 og aðeins einn af fjórum fyrstu þegar Íslandsmeistaratitilinn vannst sumarið 1982.

Við þurfum því að fara alla leið aftur til ársins 1981 til að finna aðra eins byrjun hjá Víkingum í efstu deild og þá hafði félagið aðsetur í Hæðargarðinum en ekki niðri í Vík.

Víkingar voru nefnilega líka taplausir og með þrjár sigra eftir fjóra fyrstu leiki sína sumarið 1981. Markatala liðsins var þá 8-3. Markatala Víkinga í sumar er sú sama.

Víkingar enduðu á því að vinna Íslandsmeistaratitilinn um haustið 1981 sem var fyrsti Íslandsmeistaratitill félagsins í 57 ár eða síðan 1924.

Þetta er líka stigamet hjá Víkingsliðinu í fyrstu fjórum leikjunum. Þeir fengu aðeins sjö stig í fyrstu fjórum leikjunum sumarið 1981 því þá var ekki búið að taka upp þriggja stiga regluna.

Flest stig Víkinga eftir fjóra leiki í nútímafótbolta (1977-2021):