Ekki talinn geta spillt sönnunargögnum

Búið sé að ná utan um þá þætti málsins sem þeir tengist og því ekki tilefni til frekara gæsluvarðhalds. Þeir séu enn sakborningar í málinu.

Íslendingur á fimmtugsaldri var látinn laus úr haldi í dag þegar gæsluvarðhald yfir honum rann út. Honum er þó gert að sæta farbanni í fjórar vikur og má því ekki fara úr landi.

Morðið í Rauðagerði er með stærri sakamálarannsóknum seinni ára hjá lögreglunni á höfuðborgarsvæðinu. Margeir segir um tuttugu manns hjá lögreglu og á ákærusviðinu koma að rannsókn málsins. Alls hafa níu sætt gæsluvarðhaldi vegna málsins en alls hafa tólf verið handteknir.

Fimm eru enn í gæsluvarðhaldi. Gæsluvarðhald yfir fjórum rennur út á morgun og þeim fimmta á föstudaginn. Margeir segir að ákvörðun hafi verið tekin að krefjast áframhaldandi gæsluvarðhalds yfir þremur hinna fjögurra á morgun. Lögregla hafi ekki tekið ákvörðun í tilfelli fjórða mannsins.

Þeir sem hafa sætt gæsluvarðhaldi hafa verið í einangrun á Hólmsheiði þar sem lögregla hefur aðstöðu til að yfirheyra sakborninga. Margeir vill ekki tjá sig um einstaka þætti sem fram hafa komið við rannsókn málsins og gefur ekki uppi hvort morðvopnið sé fundið. Fréttastofa hafði heimildir fyrir því á dögunum að morðvopnið væri ófundið.

Margeir segir lögreglu enn bíða niðurstaða úr krufningu á hinum látna. Það sé þó aðeins eitt af málsgögnum sem lögregla vilji skoða. Margt annað sé í gangi í málinu en krufningarskýrsla vissulega meðal gagna sem beðið er.

Hann vill ekki segja til um hvort lögregla telji sig hafa grunaðan morðingja í haldi en segir þó að lögregla telji sig hafa handtekið alla þá sem tengist málinu á einhvern hátt.