„Gaur sem er að bíða eftir þér“

Fjórir eru í haldi lögreglu en auk þess hefur lögregla rætt við fjölda vitna að sögn Margeirs.

Óhætt er að segja að lögregla haldi spilunum þétt að sér varðandi rannsókn morðsins sem vakið hefur óhug í íslensku samfélagi. Karlmanni var ráðinn bani fyrir utan heimili sitt á laugardagskvöld með skotvopni. Samkvæmt heimildum fréttastofu var hinn látni skotinn mörgum skotum þar á meðal í höfuðið.

Margeir segir rannsókn málsins í upphafi hafa leitt lögreglu til karlmanns sem var handtekinn og úrskurðaður í gæsluvarðhald. Samkvæmt heimildum fréttastofu er umræddur karlmaður frá Litháen og var handtekinn í íbúð í Garðabæ sem annar karlmaður, sem handtekinn var í gærkvöldi ásamt tveimur erlendum karlmönnum, hefur til umráða. 

Sá hefur verið titlaður fíkniefnabarónn af lögreglu og nýlegur leki á gögnum í lögreglurannsókn benda til þess að hann hafi verið upplýsingagjafi lögreglu um árabil.

Rannsókn málsins beinist meðal annars að því hvort árásin tengist uppgjöri í undirheimunum í tengslum við skipulagða brotastarfsemi.

Hótun í skilaboðum

Fréttablaðið segir í umfjöllun um málið í dag að hinn meinti fíkniefnabarónn hafi haft öryggis síns vegna hóp erlendra karlmanna í kringum sig eftir að gagnalekann. Þá hefur blaðið undir höndum skilaboð frá honum til margdæmds glæpamanns sem hann grunar um að hafa lekið gögnunum. 

Ljóst er að gagnalekinn setti fíkniefnabaróninn meinta í erfiða stöðu enda ekki vinsælt í undirheimum að veita lögreglu upplýsingar. Mennirnir voru áður vinir og má sjá myndir af þeim tveimur í góðum gír á Facebook áður en kastaðist í kekki milli þeirra.

Fréttablaðið segir að skilaboðin hafi verið send fyrir um tveimur vikum. Þar segist hinn meinti fíkniefnabarónn hafa orðið fyrir óbætanlegu tjóni af völdum mannsins og sé því nauðugur kostur að gera honum illt. Skilaboðunum fylgdu, að sögn Fréttablaðsins, mynd af Litháanum sem nú situr í gæsluvarðhaldi vegna morðsins í Rauðagerði og skilaboðin: 

„Gaur sem er að bíða eftir þér“.

Nú tveimur vikum síðar situr karlmaðurinn frá Litháen í gæsluvarðhaldi á grundvelli rannsóknarhagsmuna vegna morðsins á albanska karlmanninum. Litháinn mun samkvæmt heimildum Fréttablaðsins vera búsettur á Spáni en meintur fíkniefnabarón dvelur stóran hluta ársins í sólinni þar syðra.

Rætt við fjölda manns

Margeir Sveinsson yfirlögregluþjónn veitir litlar upplýsingar um málið í samtali við fréttastofu. Karlmennirnir þrír sem handteknir voru í gærkvöldi eru enn í haldi til viðbótar við Litháann sem er í gæsluvarðhaldi.

„Við erum búnir að ræða við fjölda manns, vitni,“ segir Margeir. Þá hafi lögreglan á höfuðborgarsvæðinu leitað liðsinnis embætta innanlands sem erlendis. Rannsóknin teygi sig þó enn sem komið er ekki út fyrir landsteinana að sögn Margeirs.

Lögregla hafi lagt hald á einhverja muni við rannsókn sína en vill ekki segja til um hvort morðvopnið sé þeirra á meðal.

Svör Margeirs við öðrum spurningum fréttastofu eru á sama hátt.

„Ég ætla ekki að tjá mig um það.“