Íslenska landsliðið fer ekki til Frakklands

Samkvæmt KSÍ er ákvörðunin tekin vegna stöðunnar í Evrópu vegna kórónuveirufaraldursins.

Noregur hafði áður dregið lið sitt úr keppni vegna þeirra ferðatakmarkana sem eru í gildi vegna faraldursins. Eftir stóðu lið Frakklands, Sviss og Íslands, og franskir miðlar greindu frá því í gær að leit stæði yfir að liði til að fylla í skarð Noregs. Nú er hins vegar ljóst að Ísland verður að minnsta kosti ekki með.

Leikirnir í Frakklandi áttu að vera þeir fyrstu hjá Íslandi undir stjórn nýs þjálfara, Þorsteins Halldórssonar, en nú er ljóst að bið verður á því að hann velji sinn fyrsta landsliðshóp. 

Samkvæmt tilkynningu frá KSÍ eru næstu leikir landsliðsins vináttuleikir dagana 5.-13. apríl. Næstu leikir í undankeppni eru áætlaðir í haust þegar undankeppnin fyrir HM í Ástralíu á að hefjast. Ísland spilar svo í lokakeppni EM sumarið 2022 eftir að hafa tryggt sér sæti þar 1. desember síðastliðinn.