„Gleðidagur fyrir íslenskt íþróttalíf“

Í minnisblaði sínu til heilbrigðisráðherra lagði sóttvarnalæknir til að keppni og æfingar í íþróttum í öllum aldursflokkum yrðu heimilar frá og með miðvikudeginum 13. janúar, að því gefnu að kórónuveirufaraldurinn haldist í lágmarki. Engir áhorfendur mega þó vera á leikjum. Tillögurnar gilda til 17. febrúar.

Ekki hefur verið leikið á Íslandsmótinu í handbolta síðan í byrjun október og ekki er langt síðan leikmenn máttu byrja að æfa saman á ný. 

„Þetta eru frábærar fréttir og mikil tilhlökkun að komast út á gólfið. Ekki síst fyrir unglingana, 3. flokkinn, sem hafa verið í frosti og við höfum haft miklar áhyggjur af. Það er gott að þeir fái að komast í gang og við fáum að spila,“ sagði Gunnar í samtali við Vísi í dag.

Keppni í Olís-deild kvenna hefst laugardaginn 16. janúar og karladeildin hefst svo 24. janúar.

„Vonandi náum við að keyra mótið áfram og enn er nægur tími,“ sagði Gunnar en HSÍ hefur gefið sér frest fram í júní til að ljúka keppni á Íslandsmótinu.

„Það er tilhlökkun hjá öllum og þetta er kannski það sem menn þurftu í upphafi árs, svona jákvæðar fréttir,“ sagði Gunnar. „Það hefði verið högg að þurfa að bíða lengur því þá hefði mótið líka verið í meiri hættu.“

Gunnar segir að Mosfellingar séu búnir að æfa vel að undanförnu og klárir í bátana.

„Við erum búnir að æfa á fullu og nú fara menn bara að skipuleggja æfingaleiki í Olís-deildinni strax eftir 12. janúar og komast í gang. Þetta er gleðidagur fyrir íslenskt íþróttalíf,“ sagði Gunnar að lokum.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.