Handbolti

Leikmaður Svía smitaður og leik frestað viku fyrir HM

Ingvi Þór Sæmundsson skrifar
HM í Egyptalandi átti að vera fyrsta stórmót Antons Lindskog á ferlinum. Hann þarf nú að bíða eitthvað lengur eftir því að komast á stórmót.
HM í Egyptalandi átti að vera fyrsta stórmót Antons Lindskog á ferlinum. Hann þarf nú að bíða eitthvað lengur eftir því að komast á stórmót. getty/David Lidstrom

Fresta þurfti leik Svíþjóðar og Svartfjallalands í undankeppni EM í handbolta karla sem átti að fara fram í kvöld vegna kórónuveirusmits í herbúðum Svía.

Anton Lindskog, leikmaður Wetzlar, var svo óheppinn að greinast með kórónuveiruna. Sökum þess var leik Svía og Svartfellinga sem átti að fara fram í Svartfjallalandi frestað um óákveðinn tíma.

Sænska liðið er nú komið í sóttkví aðeins viku áður en keppni á heimsmeistaramótinu í Egyptalandi hefst. Aðrir leikmenn liðsins fara í skimun á næstu dögum og Svíar krossa fingur yfir því að ekki greinist fleiri smit í þeirra herbúðum.

Svíþjóð á að mæta Svartfjallalandi í undankeppni EM á heimavelli á laugardaginn en óvíst er hvort leikurinn geti farið fram.

Fyrsti leikur Svía á HM er gegn Tékkum fimmtudaginn 14. janúar. Auk Svíþjóðar og Tékklands eru Egyptaland og Síle í G-riðli heimsmeistaramótsins.

HM 2021 í handbolta Sænski handboltinn Faraldur kórónuveiru (COVID-19)

Mest lesið


Fleiri fréttir

Sjá meira


×

Mest lesið